अछामका अग्नी पीडतलाई सुदूरपश्चिम प्रदेश सरकारले आर्थिक सहयोग गर्ने निर्णय गरेको छ।
अछामको साँफेबगर नगरपालिका –३ हाटबजारमा शनिबार राति भएको आगलागीबाट पीडितलाई प्रदेश सरकारले ८ लाख रूपैयाँ आर्थिक सहयोग गर्ने निर्णय गरेको हो।
बुधबार मुख्यमन्त्री कमलबहादुर शाहको अध्यक्षतामा मुख्यमन्त्री निवासमा बसेको प्रदेश विपद् व्यवस्थापन परिषद्को बैठकले अछामका आगलागी पीडितका लागि तत्काल साँफेबगर नगरपालिकालाई आर्थिक सहयोग गर्ने निर्णय गरेको हो।
मुख्यमन्त्री शाहले अछाममा आगलागी पीडित परिवार तथा व्यवसायीलाई ८ लाख रुपैयाँ सहयोग गर्ने निर्णय भएको जानकारी दिए।
बैठकले २०८२ साल भदौमा दार्चुलाको व्यास गाउँपालिका – १ स्थित टिंकर र छाङरु क्षेत्रमा आएको बाढी पहिरोबाट क्षतिग्रस्त भएका पुलहरुको तत्काल पुननिर्माण गर्न भौतिक पूर्वाधार विकास मन्त्रालयलाई सिफारिस गर्ने निर्णय पनि गरेको छ।
त्यस्तै कञ्चनपुरको लालझाडी गाउँपालिका, बेलौरी, शुक्लाफाँटा, बेदकोट, भीमदत्त र दोधरा चाँदनी नगरपालिकामा वन्यजन्तुको आक्रमण हुने मानवीय क्षति, मानव बस्तीमा आक्रमण र खेतबारीमा हुने बालीनाली नोक्सानी न्यूनीकरण गर्न रोकथाम उपायहरु अवलम्बन गर्न टर्चलाइट लगायतका उपकरण स्थानीयस्तरमा वितरण गर्ने गरी आवश्यक प्रबन्ध गर्न उद्योग, पर्यटन, वन तथा वातावरण मन्त्रालयलाई सिफारिस गर्ने निर्णय गरेको छ।
-1746009348.jpg)
