अमेरिकाको एउटा पुस्तकालयमा बिहान सबेरै अनौठो पाहुना पुग्यो— कालो भालु।
त्यहाँ उसले कर्मचारीका लागि राखिएको मह खायो, पुस्तकालयभित्र घुम्यो र आफै बाहिर निस्कियो।
पिपुल म्यागेजिनका अनुसार, गत बुधबार, अक्टोबर १४ मा क्यालिफोर्नियाको म्यामथ लेक्स पुस्तकालयमा यो घटना भएको हो।
यो घटनासँग समयको रोचक संयोग जोडिएको छ। मह मन पराउने काल्पनिक भालुबारेको पुस्तक 'विनी द पू' विश्वप्रसिद्ध छ।
यो पुस्तक प्रकाशन भएको ठ्याक्कै सय वर्ष पुगेको दिन यो भालुले पुस्तकालयमा छिरेर मह खाएको घटनाले धेरैलाई रोमाञ्चित पारेको छ।
लेखक ए. ए. मिल्नले लेखेको उक्त बालपुस्तक सन् १९२६ को अक्टोबर १४ मा पहिलो पटक प्रकाशन भएको थियो।
मोनो काउन्टी फ्री लाइब्रेरीजले जारी गरेको विज्ञप्ति अनुसार, सर्वसाधारणका लागि बिहान १० बजे खुल्ने पुस्तकालयमा भालु करिब चार घन्टा अगाडि नै पसेको थियो। त्यति बेला त्यहाँ कर्मचारी उपस्थित थिएनन्।
पुस्तकालयका निर्देशक जोसेफ बपका अनुसार भालु भित्र पसेपछि सिधै कर्मचारीको खाजा राखिएको ठाउँतिर लागेको थियो। उसले महसँगै पिनट बटर, बिस्कुट र आरू पनि खायो।
त्यसपछि नयाँ किताब राखिएको भाग र जानकारी दिने डेस्कतिर घुमेर बाहिरियो। पुस्तकालयका अनुसार भालुले कुनै र्याक ढालेन, कुनै किताब बिगारेन।
मोनो काउन्टी शिक्षा कार्यालयले भालु पुस्तकालयभित्र घुमिरहेको सिसिटिभी भिडिओ सार्वजनिक गरेको छ।
कार्यालयले ठट्टा गर्दै लेखेको छ— ऊ सायद 'विनी द पू' किताब खोज्न आएको होला!
पुस्तकालयका निर्देशक बपले पनि रमाइलो टिप्पणी गरेका छन्— खाजा चाहिँ पुस्तकालयबाट सापटी लैजान मिल्ने सामग्रीमा पर्दैन नि!
पुस्तकको शतवार्षिकी मनाउन पुस्तकालयले आफ्ना सात वटा शाखामा 'विनी द पू' वा भालु सम्बन्धी अरू किताब पढ्न आउन स्थानीयलाई निम्तो दिएको छ।
पुस्तकालयले ठट्टा गर्दै भनेको छ— निम्तो 'मानिसलाई मात्र' हो है!
भालु पुस्तकालयभित्र कसरी पस्यो भन्ने चाहिँ अझै खुलेको छैन। त्यसको छानबिन हुँदैछ।
पुस्तकालयले स्थानीय बासिन्दा र आगन्तुकलाई जंगली भालुको नजिक नजान र खाना नदिन पनि आग्रह गरेको छ।
पिपुल म्यागेजिनका अनुसार पुस्तकालयले घटनापछिको पोस्टमा अर्को ठट्टा पनि गरेको छ— महको भाँडो चाहिँ अझै फिर्ता आएको छैन!
