भूमि सुधार तथा मालपोत कार्यालय पर्साको कामकाज दिनभर प्रभावित भएको छ। लेखापढी कानुन व्यवसायीले ‘पेन डाउन’ गरेर आन्दोलन गरेपछि कामकाज प्रभावित बनेको हो।
लेखापढी कानुन व्यवसायी र भूसेवा केन्द्र सञ्चालकहरूले सेवाग्राहीको काम नगरिदिएपछि मालपोत कार्यालयमा सेवा लिन आएका सेवाग्राही त्यसै फर्किएका छन्।
व्यवसायीलाई धरपकड र गिरफ्तारी गरिएको विरोधमा देशभरका लेखापढी व्यवसायीहरू आन्दोलनमा उत्रिएका छन्।
लेखापढी कानुन व्यवसायी एसोसिएसन, जिल्ला कार्य समिति मालपोत कार्यालय पर्सा प्रांगणले आइतबार विज्ञप्ति जारी गर्दै अनिश्चितकालीन ‘पेन डाउन’को घोषणा गरेको थियो।
जिल्ला कार्य समिति अध्यक्ष सुरेन्द्र प्रसाद यादवले नेपाल सरकारको नियम अनुसार भूसेवा केन्द्र सञ्चालन अनुमति लिई धरौटी बुझाएर कार्य सञ्चालन गरिरहेकोमा विभिन्न बहानामा धरपकड गरिएको विरोधमा पेन डाउन गरिएको बताए। प्रहरीले पक्राउ गरेका व्यवसायीहरूको निशर्त रिहाइ गर्नुपर्ने उनीहरूको माग छ।
अड्डा अदालतमा लेखापढी गर्न प्रमाणपत्र पाएका व्यक्तिहरू लेखापढी व्यवसायी हुन्।
सेवाग्राहीसँग शुल्क लिएर उनीहरूले राजीनामा, बकसपत्र लगायत मालपोत कार्यालयमा पारित हुने लिखतहरू तयार गर्दै आएका छन्।
अनुमति पत्र लिएर कामकाज गरिरहेका उनीहरूसँग मालपोत कार्यालयले प्रयोग गर्दै आएको कम्प्युटर प्रणालीमा सेवाग्राहीको निवेदन लगायत कागजात इन्ट्री गर्नेसम्मको अधिकार प्रदान गरिएको छ।
भूमि सुधार तथा मालपोत कार्यालय पर्साका प्रमुख मालपोत अधिकृत खेमराज खत्रीले लेखापढी व्यवसायी र भू सेवा केन्द्रका सञ्चालकहरूको आन्दोलनले कार्यालयको कामकाज आंशिक प्रभावित भएको बताए।
‘उहाँहरूमार्फत आउनुपर्ने कामकाज प्रभावित भयो, बाँकी कार्यालयले गर्ने सेवा दिनभर प्रदान गरेका छौं,’ उनले भने।
उनीहरूले अनिश्चितकालसम्म आन्दोलन जारी राखे विकल्पमा कसरी जाने भन्ने बारेमा माथिल्लो निकायसँग परामर्श समेत गरिरहेको उनको भनाइ छ।
‘उहाँहरूले अनलाइन फर्म भर्ने हो, लिखत तयार गरिदिने हो। आवश्यक कागजात सहित सेवाग्राही आएपछि हामीले सेवा दिन्छौं,’ उनले भने, ‘तर उहाँहरू कार्यालयभित्र आउन पाउनुपर्ने अडानमा हुनुहुन्छ, कागजात हराउँदा कर्मचारी जिम्मेवार हुनुपर्छ।’
-1775485028.jpg)
-1746009348.jpg)
