परीक्षा तालिका पुनर्निर्धारणको माग गर्दै लमजुङ क्याम्पसका चौथो र छैटौँ सेमेस्टरका विद्यार्थीहरू २० दिनदेखि क्याम्पस प्रमुखको कार्यकक्षमा रिले अनसनमा बसेका छन्।
विद्यार्थीहरूले चुनावअघि सञ्चालन हुन नसकेको परीक्षा चुनावपछि सञ्चालन गराउने सहमति कार्यान्वयन गर्न माग गर्दै अनसन थालेका हुन्।
क्याम्पस प्रशासनले भने अहिलेसम्म परीक्षा तालिका पुनर्निर्धारण नगरेको उनीहरूको आरोप छ।
क्याम्पसले फागुन ९ गतेबाट चौथो सेमेस्टर र फागुन १० गतेबाट छैटौँ सेमेस्टरको परीक्षा सुरू हुने गरी तालिका प्रकाशित गरेको थियो। तर विद्यार्थीहरूले आफ्नो पाठ्यक्रम पूरा नभएको, ९० कार्यदिन पनि नपुगेको तथा परीक्षाकै बीचमा निर्वाचन परेकाले मानसिक दबाब पर्ने भन्दै परीक्षा चुनावपछि सार्न माग गरेका थिए। क्याम्पसमा मतदान केन्द्र रहेको र छात्रावास खाली गर्नुपर्ने अवस्थाले पनि परीक्षा दिन कठिन हुने उनीहरूको भनाइ छ।
बारम्बार आग्रह गर्दा पनि प्रशासनले ध्यान नदिएको भन्दै विद्यार्थीहरूले क्याम्पसमा तालाबन्दी समेत गरेका थिए। त्यसपछि क्याम्पस प्रमुख र विद्यार्थीबीच वार्ता भई लिखित सहमति भएको थियो। सहमतिअनुसार चुनावपछि चौथो सेमेस्टरका तीन र छैटौँ सेमेस्टरका चार विषयको परीक्षा सञ्चालन गर्ने तथा बाँकी विषयहरूको परीक्षा पुनर्निर्माण गर्ने सहमति भएको विद्यार्थीहरूले बताएका छन्।
तर अहिलेसम्म पनि बाँकी विषयको परीक्षा पुनर्निर्माण नभएको भन्दै विद्यार्थीहरूले आन्दोलन जारी राखेका छन्।
-1746009348.jpg)
