अध्यागमन विभागले धोबिघाट र चोभारमा छापा मारेर ९ जना चिनियाँ नागरिकलाई नियन्त्रणमा लिएको छ। उनीहरूको साथबाट र १८ वटा पासपोर्ट पनि बरामद गरिएको छ।
चिनियाँ नागरिकहरू शंकास्पद गतिविधिमा संलग्न रहेको सूचनाका आधारमा विभागले सुरूमा ललितपुरको धोबिघाटको अनुगमन तथा तलासी लिएको प्रवक्ता एवं निर्देशक टीकाराम ढकालले जानकारी दिए।
विभागबाट खटिएको टोलीले उक्त स्थानबाट ३ जना चिनियाँ नागरिकलाई नियन्त्रणमा लिएको हो।
त्यस्तै, चोभारस्थित ट्रेजर्स प्रालिमा शंकास्पद गतिविधिमा संलग्न ६ लाई नियन्त्रणमा लिएको हो।
प्रारम्भिक अनुसन्धानको क्रममा धोबिघाटको चार तले घरमा २९ जना चिनियाँ नागरिक बस्दै आएको खुलेको छ।
विभागको टोली पुग्दा ११ पुरूष र ११ महिला गरी २२ जना चिनियाँ नागरिक भेटिएका थिए। तीमध्ये ४ जना व्यावसायिक र १८ जना पर्यटक भिसामा नेपालमा रहेको पाइएको छ।
सबैसँग वैध भिसा भए पनि २२ जनामध्ये १८ जनाले मात्र राहदानी पेस गरेका थिए।
बाँकी ४ जनाले राहदानी भिसा प्रयोजनका लागि कानुन व्यवसायीसँग रहेको बताएपछि अनुसन्धानका लागि १८ थान राहदानी बरामद गरिएको हो।घर ड्रागन ब्रिज इन्टरनेसनल प्रालिले लिजमा लिएको खुलेको छ।
अनुगमनका क्रममा उक्त घरलाई होस्टल भनिए पनि होस्टल सञ्चालन सम्बन्धी कुनै आधिकारिक साइन बोर्ड, उद्योग दर्ता, स्थानीय तहमा व्यवसाय दर्ता वा अन्य कानुनी कागजात फेला नपरेको प्रवक्ता ढकालले बताए।
त्यस्तै, महिला र पुरूषलाई एउटै आवासमा राखिएको पाइएको छ।
आफूलाई होस्टल सञ्चालक बताउने कर्मा शेर्पा र मञ्जु लामासँग त्यहाँ बसोबास गर्ने विदेशी नागरिकको अभिलेख वा वास्तविक विवरणसमेत उपलब्ध नभएको पाइएको छ।
प्रारम्भिक अनुसन्धानबाट अधिकांश चिनियाँ नागरिक पर्यटक भिसामा नेपालमा बसोबास गर्दै चोभारस्थित ट्रेजर्स प्रालि तथा ड्रागन ब्रिज इन्टरनेसनल प्रालिसँग आबद्ध भई कार्यरत रहेको खुलेको छ।
यसबाट उनीहरू भिसाको उद्देश्य विपरीत गतिविधिमा संलग्न रहेको देखिएको विभागले जनाएको छ।
उक्त घर सुमन कार्कीको स्वामित्वमा रहेको र ड्रागन ब्रिज इन्टरनेसनल प्रालिले लिजमा सञ्चालन गरिरहेको खुलेको छ।
ढकालले चोभारमा लिजमा लिइएको घरमा पनि शंकास्पद गतिविधि भएको पाएको बताए।
भारतीय आयुर्वेदिक उत्पादनको प्रदर्शनी केन्द्रका रूपमा सञ्चालन गरिएको उक्त भवनमा अत्यधिक सुरक्षा व्यवस्था, ठूलो संख्यामा
सिसिटिभी, निजी सुरक्षा गार्ड परिचालन तथा सर्वसाधारणलाई पूर्ण रूपमा प्रवेश निषेध गरिएको अवस्था फेला परेको उनले बताए।
‘भवनका विभिन्न कोठामा पर्यटक आउन मनाही लेखिएका स्टिकर टाँसिएको तथा निजी संस्थाले प्रयोग गर्ने पास कार्डमा नेपालको राष्ट्रिय निशान छाप प्रयोग गरिएको पनि भेटिएको छ,’ ढकालले भने।
अनुगमनका क्रममा सिसिटिभी डाटा रूमसँग जोडिएको झ्यालविहीन अन्धकार कोठामा बाहिरबाट ताल्चा लगाइएको अवस्थामा ७ जना चिनियाँ नागरिक लुकेर बसेको भेटिएको थियो।
तीमध्ये ५ जनालाई नियन्त्रणमा लिइएको छ भने २ जना फरार भएका छन्। प्रारम्भिक अनुसन्धानका क्रममा केही चिनियाँ नागरिक क्रिप्टो कारोबारमा संलग्न रहेको आशंका समेत गरिएको छ।
विभागले दुबै घटनासम्बन्धी थप अनुसन्धान गरिरहेको छ। भिसाको उद्देश्य विपरित गतिविधिमा संलग्न विदेशी नागरिक तथा सम्बन्धित व्यक्ति र संस्थामाथि प्रचलित कानुनबमोजिम आवश्यक कारबाही प्रक्रिया अघि बढाइने विभागले जनाएको छ।
