भदौ २४ गते कारागारबाट भागेका २५ करोड विदेशी मुद्राको भरिया बनेका फुच्चे भन्ने कुसाङ लामा फेरि पक्राउ परेका छन्।
केन्द्रीय कारागार कार्यालय जगन्नाथदेवलबाट भागेका उनलाई काठमाडौं उपत्यका अपराध अनुसन्धानको भक्तपुरको टोलीले पक्राउ गरेको हो। उनी सिन्धुपाल्चोक घर भई काठमाडौंको बौद्ध बस्दै आएका थिए।
एसपी शरतकुमार थापा क्षेत्रीका अनुसार उनी पुर्पक्षका लागि थुनामा बसिरहेको अवस्थामा भदौ २४ गते भागेका थिए।
उनीविरूद्ध राजस्व छली सम्बन्धी कसुरमा अनुसन्धान भएर मुद्दा विचाराधीन छ।
२०८१ चैत ४ गते काठमाडौंको टोखाबाट प्रहरीले ट्रक र २५ करोड बराबरको विदेशी मुद्रा बरामद गरेको थियो। कार्यालयकै टोलीले नारायणी प्रदेश-७ ख १६५२ नम्बरको ट्रक र चालक कुशाङ लामालाई नियन्त्रणमा लिएको थियो।
गाडीभित्र फल्सबटम बनाएर १३ लाख ७५ हजार १५० युरो र ३ लाख २० हजार ८५० डलर बरामद भएको थियो। यसको अनुसन्धान विभागले गरी मुद्दा दायर गर्दा उनलाई पुर्पक्षका लागि थुनामा पठाएको थियो।
यही घटनामा विभागले सिन्धुपाल्चोकको भोटेकोशी गाउँपालिका-४ का नारायण पौडेलविरूद्ध पनि मुद्दा चलेको थियो। उनलाई भने अदालतले ३५ लाख रुपैयाँ धरौटीमा छाड्न आदेश दिएको थियो।
विभागले उक्त रकम सुन तस्करीका लागि प्रयोग भएको हुनसक्ने आशंका गरेको थियो। त्यतिबेला पौडेल पक्राउ भने परेका थिएनन्। उनी मुद्दा दर्ता भएपछि अदालतमा उपस्थित हुन पुगेका थिए।
-1782994150.jpg)
