आलु-प्याजको बोराभित्र लागुऔषध राखेर तस्करी गरेका व्यक्ति पक्राउ परेका छन्।
लागुऔषध नियन्त्रण ब्युरोको टोलीले ३४ वर्षीय कृष्णा यादवलाई पक्राउ गरेको एसपी दुर्गाराज रेग्मीले जानकारी दिए।
उनका अनुसार असार २७ गते सप्तरीबाट बोराभित्र ३०० ग्राम खैरो हेरोइन लुकाएर काठमाडौं ल्याइएको थियो। त्यतिबेला तीन जना पक्राउ परेका थिए।
अनुसन्धानका क्रममा उनीहरूलाई लागुऔषध कृष्णा यादवले दिएर पठाएको खुलेको थियो।
कृष्णा पहिले पनि लागुऔषध कारोबार गरेको कसुरमा पक्राउ परेका थिए। उनी जेनजी आन्दोलनमा फरार भएका थिए।
यसअघि उनले आफ्नी दोस्रो श्रीमतीलाई काठमाडौंमा राखेर कारोबार गर्न लगाएको पनि अनुसन्धानमा खुलेको छ।
२०८२ असार १२ गते उनकी श्रीमती सबिनालाई पक्राउ गरेको थियो। त्यस्तै २०८२ भदौ २४ गते सप्तरीबाट कृष्णा पक्राउ परेका थिए। तर उनी फरार भएका हुन्।
उनकी श्रीमती सबिनालाई प्रहरीले ८८ ग्राम खैरो हेरोइनसहित फागुन २७ गते पक्राउ गरेको हो। उनी हाल पुर्पक्षका लागि थुनामा पठाइएका छन्।
