सुरेश रैनाले भारतीय क्रिकेटरले विदेशी टी-२० लिग खेल्नु पाउनु पर्ने माग गरेका ंछन्।
ब्याट्सम्यान रैनाले भारतीय क्रिकेट कन्ट्रोल बोर्डले भारतीय खेलाडीहरुलाई विदेशी टी-२० लिग खेल्नका लागि लगाएको प्रतिबन्ध हटाउन माग गरेका हुन्।
भारतीय क्रिकेट बोर्डले सक्रिय खेल जीवनमा रहेका खेलाडीलाई विदेशी फ्रेन्चाइज टिमसँग सम्झौता गर्न अनुमति दिने गरेको छैन।
भारतले आफ्नै लिग आइपिएलको महत्व नघटोस् भनेर विदेशमा खेल्न अनुमति नदिएको हो।
रैनाले आइपिएलमा मात्र सीमित गर्दा धेरै खेलाडीले आफ्नो प्रतिभा देखाउन नपाएको बताए।
पछिल्लो समय भारतीय राष्ट्रिय टिममा नरहेका आफू, रबिन उथप्पा, युसुफ पठान जस्ता खेलाडीले विदेशी लिग खेल्न चाहिरहेको उनको भनाइ छ।
रैनाले भारतका लागि २२६ एकदिवसीय र ७८ टी-२० खेल खेलेका छन्। तर उनले जुलाई २०१८ देखि भारतीय टिमबाट खेलेका छैनन्।
३३ वर्षीय रैना आइपिएल टिम चेन्नइ सुपर किंग्सका महत्वपूर्ण सदस्य हुन्। यो सिजनको आइपिएल भने कोरोनाका कारण अनिश्चितकालका लागि स्थगित छ।
