आइसिसी टी-२० विश्वकप २०२६ का लागि अफगानिस्तानले राष्ट्रिय टोली घोषणा गरेको छ। स्टार स्पिनर रसिद खानको कप्तानीमा १५ सदस्यीय टोलीमा नवीन उल हकसहित चार खेलाडीले पुनरागमन गरेका छन्।
सन् २०२६ मा भारत र श्रीलंकामा आयोजना हुने विश्वकप खेल्नुअघि यही टोलीले संयुक्त अरब इमिरेट्समा वेस्ट इन्डिजसँग तीन खेलको टी-२० शृङ्खला पनि खेल्नेछ।
चोटका कारण लामो समय मैदान बाहिर रहेका तीव्र गतिका बलर नवीन उल हक टोलीमा फर्किएका छन्। उनले अन्तिम पटक सन् २०२४ को डिसेम्बरमा जिम्बावेविरुद्ध खेलेका थिए।
बंगलादेश भ्रमणमा टोलीमा नपरेका दुई अनुभवी फजलहक फारुकी र गुलबदिन नाइबलाई पनि विश्वकपका लागि टोलीमा फिर्ता बोलाइएको छ।
अनुभवी स्पिनर मुजिब उर रहमान टोलीमा फर्किएपछि युवा स्पिनर एएम गजनफरलाई भने वैकल्पिक (रिजर्भ) खेलाडीमा राखिएको छ।
सन् २०२४ मा भएको अघिल्लो विश्वकपमा अफगानिस्तानले उत्कृष्ट प्रदर्शन गर्दै सेमिफाइनलसम्मको यात्रा तय गरेको थियो। त्यस क्रममा उसले न्युजिल्यान्ड, अस्ट्रेलिया र वेस्ट इन्डिज जस्ता विश्वका शक्तिशाली टोलीहरूलाई हराएर सबैलाई चकित पारेको थियो।
यसपटक अफगानिस्तान समूह 'डी' मा रहेको छ। यस समूहमा न्युजिल्यान्ड, दक्षिण अफ्रिका, युएई र क्यानडा रहेका छन्।
अफगानिस्तानले फेब्रुअरी ८ तारिखमा भारतको चेन्नाईमा न्युजिल्यान्डसँग खेल्दै आफ्नो विश्वकप यात्रा सुरु गर्नेछ।
अफगानिस्तान टोली
रसिद खान (कप्तान), इब्राहिम जद्रान (उप-कप्तान), रहमानुल्लाह गुरबाज (विकेटकिपर), मोहम्मद इसाक (विकेटकिपर), सेदिकुल्लाह अटल, दरविस रसुली, साहिदुल्लाह कमल, अजमतुल्लाह ओमरजई, गुलबदिन नाइब, मोहम्मद नाबी, नुर अहमद, मुजिब उर रहमान, नवीन उल हक, फजलहक फारुकी र अब्दुल्लाह अहमदजई।
वैकल्पिक खेलाडी : एएम गजनफर, इजाज अहमदजई र जिया उर रहमान सरिफी।
-1746009348.jpg)
