घरेलु टोली अस्ट्रेलिया र भारतबीच पाँचको खेलको टेस्ट सिरिज शुक्रबारदेखि पर्थमा सुरू भएको छ।
टस जितेर पहिले ब्याटिङ गरेको भारत पहिलो इनिङ्ग्समा पहिलो दिनको टी ब्रेकअघि १५० रनमै अलआउट भएको छ।
ओपनर यशस्वी जैसवाल शून्यमा आउट भएका थिए। उनले आठ बल मात्र खेले। अर्का ओपनर केएल राहुलले २६ रन मात्र बनाउन सके।
तर देवदुत पाडिकलले २३ बल खेल्दा कुनै रन बनाउन सकेनन्। विराट कोहली पनि ५ रनमा आउट हुँदा भारत सुरूमै संकटमा परेको थियो।
अस्ट्रेलियाका मिचेल स्टार्कले भारतका दुवै ओपनरलाई आउट गर्दा हजलउडले पाडिकल र कोहलीलाई सिकार बनाए।
ध्रुव जुरेल ११ रन, वासिङटन सुन्दर ४ रन र हर्षित राना ७ रनमा आउट हुँदा भारतको मध्यक्रम पनि ध्वस्त भएको थियो। रिशव पन्तले ३७ रन र नितिश कुमार रेड्डी ४१ रन जोडे। रेड्डी र हर्षित रानाले टेस्टमा डेब्यू गरेका हुन्। यस्तै कप्तान जसप्रित बुमराह ८ रनमा आउट भए।
बलिङमा अस्ट्रेलियाका हजलउडले ४ विकेट लिए भने स्टार्क, पाट कमिन्स र मिचेल मार्सले २-२ विकेट लिन सफल भए।
जवाफी ब्याटिङ गरेको अस्ट्रेलिया पनि भारतविरूद्ध संघर्षरत छ। उसले पहिलो दिनको खेल सकिदा ६७ रन मात्र बनाउँदा ७ विकेट गुमाइसेको छ।
अस्ट्रेलियाका लागि एलेक्स क्यारीले नटआउट १७ रन बनाएर खेलिरहेका छन्। अरु ब्याटरले भने योभन्दा पनि कम स्कोर बनाएर आउट भए।
अस्ट्रेलियाका आउट भएका सात ब्याटरमध्ये सर्वाधिक रन बनाएका ट्राभिस हेडले ११ रन मात्र जोड्न सके।
बलिङमा भारतका कप्तान बुमराहले ४ विकेट लिइसकेका छन् भने मोहमद सिराजले २ विकेट हात पारेका छन्। हर्षितले १ विकेट हात पारेका छन्।
