आइसिसी क्रिकेट विश्वकप लिग-२ अन्तर्गत त्रिकोणात्मक सिरिजमा नेपालले आज संयुक्त अरब इमिरेट्स (युएई)सँग खेल्दैछ।
दुबई अन्तर्राष्ट्रिय रंगशालामा बिहान सवा ११ बजे नेपालले युएईसँग प्रतिस्पर्धा गर्दैछ।
लिग-२ को जारी सिरिजको अघिल्लो खेलमा नेपाल अमेरिकासँग पराजित भएको थियो।
आइतबार भएको खेलमा नेपालले कमजोर ब्याटिङ गर्दा १०६ रनको पराजय भोग्नुपरेको थियो।
युएईसँग पछिल्लो पाँच एक दिवसीय खेलमा नेपाल विजयी भएको छ।
यसअघि आइसिसी टी-२० विश्वकप छनोटका खेलमा पनि नेपालले युएईलाई पराजित गरेको थियो।
फरक फर्म्याटको खेल भए पनि नेपालले आज युएईविरूद्ध आत्मविश्वासका साथ खेल्नेछ।
१ नोभेम्बरमा अमेरिका र ५ नोभेम्बरमा फेरि युएईसँग खेलेपछि नेपाली टोली स्वदेश फर्कनेछ।
एकदिवसीय टोलीमा भीम सार्की, अनिलकुमार साह र साहब आलम टोलीमा परेका छन्। यसअघि टी-२० टोलीमा रहेका लोकेश बम, सन्दीप जोरा र आदिल अन्सारी एकदिवसीय टोलीमा छैनन्। बाँकी १२ टी-२० टोलीका खेलाडी एकदिवसीय टोलीमा समावेश छन्।
नेपाली टोली: रोहित कुमार पौडेल (कप्तान), दीपेन्द्र सिंह ऐरी (उप-कप्तान), कुशल भुर्तेल, मो. आरिफ शेख, सन्दीप लामिछाने, सोमपाल कामी, करण केसी, नन्दन यादव, गुल्शन झा, कुशल मल्ल, मो. आसिफ शेख, अनिल कुमार साह, भीम सार्की, साहब आलम, ललित नारायण राजवंशी।
आइसिसी विश्वकप लिग-२ मा लगातार जित निकालिरहेको अमेरिका, दबाब झेलिरहेको नेपाल
आइसिसी क्रिकेट विश्वकप लिग-२ अन्तर्गत अहिले युएईमा घरेलु टोलीसहित नेपाल र अमेरिकाबीच त्रिकोणात्मक सिरिज भइरहेको छ।
सिरिजको पहिलो दुवै खेलमा अमेरिकाले जित निकालेको छ। नेपाल र घरेलु टोली युएईले भने पहिलो खेलमा पराजय भोगेका छन्।
नेपाल र युएईविरूद्ध निकालेको जितले अमेरिका आठ अस्थायी एकदिवसीय मान्यता टोलीबीच जारी लिग-२ को शीर्ष स्थानमा पुगेको छ।
पहिलो खेलमा नेपाललाई पराजित गरेपछि शीर्ष स्थानमा स्कटल्यान्डलाई पछि पारेको अमेरिकाले मंगलबार युएईलाई पराजित गरेसँगै दुई अंकको अग्रता लियो। जारी सिरिजको बाँकी दुई खेलमा जित निकालेको अवस्थामा यो वर्ष अमेरिकाले लिग-२ मा ६ अंकको अग्रता कायम गर्ने सम्भावना छ।
अमेरिकाले २२ खेलबाट १६ जित निकालेर ३२ अंक जोडिसकेको छ। दोस्रो स्थानको स्कटल्यान्डको २४ खेलबाट ३० अंक छ। नेदरल्यान्ड्सको पनि समान खेलबाट २८ अंक छ भने अंक तालिकाको तेस्रो स्थानमा छ।
चौथो स्थानको ओमानले २० खेलबाट २४ अंक जोड्दा पाँचौ स्थानको क्यानडाले २१ अंक बटुलेको छ। छैटौं स्थानको नामिबियाको २४ खेलबाट १९ अंक छ। नेपाल १७ खेलबाट १२ अंक जोडेर सातौ स्थानमा छ भने नेपालको जति खेल खेलको पुछारको युएईको ६ अंक मात्र छ। नेपालले लिग-२ मा पाँच खेलमा मात्र जित निकालेको छ। २ खेलमा नतिजा आएको छैन भने १० खेलमा पराजय भोगिसकेको छ।
यो वर्ष नेपाल,ओमान र युएई बाहेक सबै टोलीले १२-१२ खेल खेलिसकेका छन्। नेपाल र ओमान र युएईले यो वर्ष अन्तिम तेस्रो सिरिज खेल्नेछैनन्। त्यसैले तीनै टोलीले वर्षको अन्त्यसम्ममा ८-८ खेल मात्र खेल्नेछन्।
सबैले टोलीले सन् २०२४ मा १२-१२ खेल खेलेका थिए। त्यसैले तीन टोलीबाहेकले आठ टोलीले दुई वर्षको अन्त्यमा २४ खेल सक्नेछन्।
नेपालले अब बिहीबार युएई, शनिबार अमेरिका र सोमबार युएईसँग खेलेपछि यो वर्षको सबै लिग-२ का खेल सक्नेछ।
अब नेपालले सन् २०२५ मा भने चार सिरिजका १६ खेल खेल्ने कार्यक्रम छ।
आइसिसी विश्वकप लिग-२ अन्तर्गत २०२४ देखि २०२६ सम्म अस्थायी एकदिवसीय मान्यता प्राप्त आठ एसोसिएट टिमबीच २४ वटा त्रिकोणात्मक एकदिवसीय सिरिज हुने तय छ। यी सिरिजको प्रतियोगितालाई आइसिसीले आइसिसी विश्वकप लिग-२ को नाम दिएको छ। लिग-२ आइसिसी एकदिवसीय विश्वकप २०२७ को छनोटको आधार समेत हो।
तीन वर्षमा यसरी हुँदैछ लिग-२
आइसिसी एकदिवसीय छनोट प्रतियोगिताको आधारको रुपमा रहेको लिग-२ मा तीन वर्षमा आठ टिमले नौं-नौ वटा सिरिज खेल्नेछन्। प्रत्येक सिरिजमा एक टिमले ४ खेल खेल्नेछ। लिग-२ मा प्रत्येक टिमले ३६ एकदिवसीय खेल खेल्नेछन्।
आइसिसीको तालिका अनुसार एक टिमले एक वर्षमा तीन सिरिज खेल्नेछ। प्रत्येक टिमका लागि एक वर्षमा एक सिरिज होम हुनेछ भने दुई सिरिज अवे हुनेछन्।
तीन वर्षमा नौ सिरिज मध्ये तीन सिरिज घरेलु मैदानम खेल्दा छ सिरिजका लागि दोस्रो देशको भ्रमण गर्नु पर्नेछ।
आठ टिम मध्ये नेपाल नामिबियामा जानेछैन। यस्तै लिग-२ का लागि क्यानडाको टिम नेपाल भ्रमणमा आउनेछैन ।
आठ टिमले कुल १४४ एकदिवसीय खेल खेलेपछि शीर्ष चारमा पर्ने टिमको एकदिवसीय मान्यता स्वतः कायम रहन्छ भने विश्वकप छनोटमा सिधा पुग्नेछन् ।
बाँकी चार टिमका लागि दोस्रो अवसर हुनेछ। चार टिमले विश्वकप क्वालिफायर प्लेअफ खेल्नेछन्। जहाँ विश्वकप च्यालेन्ज लिगबाट आउने चार टिम गरी आठ टिमबीच प्रतिस्पर्धा हुनेछ। प्लेअफबाट शीर्ष चारमा पर्ने टोलीले पनि एकदिवसीय मान्यत पाउनेछन्।
नेपाल यसरी पुग्यो लिग-२ मा
अन्तर्राष्ट्रिय क्रिकेट काउन्सिल (आइसिसी) ले एकदिवसीय विश्वकपको छनोटका लागि तीन वटा लिग सञ्चालन गर्दै आएको छ। सन् २०१९ देखि आइसिसीले चरणका लिग सञ्चालन गर्दै आएको हो।
आइसिसीका स्थायी मान्यता प्राप्त १२ टोलीले आइसिसी विश्वकप सुपर लिग (ओडिआई याङकिङ) खेल्ने गर्छन् ।
यस्तै अस्थायी एकदिवसीय मान्यता प्राप्त ८ टोलीले आइसिसी विश्वकप लिग २ मा प्रतिस्पर्धा गर्छन्। नेपालले पनि अस्थायी एकदिवसीय मान्यता प्राप्त टोली भएकाले नेपालले सन् २०१९ देखि लिग-२ खेल्दै आएको छ।
एकदिवसीय टिम बाहेका लागि भने आइसिसीले आइसिसी विश्वकप च्यालेन्ज लिग गर्दै आएको छ। च्यालेन्ज लिगमा खेल्न पनि आइसिसीले विभिन्न राष्ट्रबीच छनोट खेलाउने गरेको छ।
यसरी ३ तहको लिगबाट आइसिसीले विश्वकपका लागि टोली छनोट गर्छ। उदाहरणका लागि सन् २०२७ मा हुने एकदिवसीय विश्वकपबाट सुपर लिगबाट ८ टोली छनोट हुनेछन्। दुई टोली आयोजकको रुपमा छनोट हुनेछन्।
दक्षिण अफ्रिका र जिम्बावेमा हुने विश्वकपका लागि चार टोलीले भने विश्वकप छनोट खेलेर स्थान पक्का गर्नेछन्। चार स्थानका लागि विश्वकप छनोट प्रतियोगिता हुन्छ।
विश्वकप छनोटमा १० टोली भिड्नेछन्। सुपर लिगबाट २ टोली र लिग-२ बाट चार टोली पुग्नेछन्। बाँकी चार टोली च्यालेन्ज लिगका दुई र लिग-२ का टोलीबीच हुने प्लेअफबाट छानिनेछन् ।
आइसिसी लिग-२ खेल्नुअघि नेपालले २०१५ देखि २०१७ सम्म विश्व क्रिकेट लिग च्याम्पियनसिप खेलेको थियो। तर नेपाल आठ टोली मध्ये सातौं स्थनमा रहदा आइसिसी विश्वकप डिभिजन-२ मा झरेको थियो।
२०१५ सम्म भने नेपालले आइसिसीले सञ्चालन गर्ने विभिन्न डिभिजन खेलेको थियो। डिभिजन फस्याटको लिग अहिले आइसिसीले सञ्चालन गर्दैन।
त्यसअघि नेपालले २०१५ को डिभिजन-२ मा चौथो भएको थियो। त्यसअघि नेपालले सन् २०१३ मा बर्मुडामा भएको आइसिसी विश्वकप क्रिकेट डिभिजन-३ जितेको थियो। जसका कारण नेपालले सन् २०१५ को विश्वकप छनोट खेल्न पाएको थियो।
त्यसअघि नेपालले २०१२ मा डिभिजन-४ जितेर डिभिजन-३ मा बढुवा भएको थियो। त्यसअघि कीर्तिपुस्थित त्रिवि मैदानमा भएको डिभिजन-५ जितेको नेपालले पहिलो पटक आइसिसीको प्रतियोगिता जितेको थियो।
सो प्रतियोगिताको सेमिफाइनलमा नेपालले हार्न लागेपछि नेपाली दर्शकले मैदानमा ढुंगा प्रहार गर्दै हुलदंगा गरेका थिए। जसका कारण नेपाल रनरेटमा अघि रहदै फाइनलमा पुगेको थियो। फाइनल जितेर डिभिजन-४ मा पुगे पनि नेपालले सोहि वर्ष डिभिजन-४ मा राम्रो खेल्न सकेन र बढुवा भएन।
सन् २००८ मा पनि नेपालले डिभिजन-५ खेलेको थियो। तर निर्णायक खेलमा पराजय भोग्दा नेपाल डिभिजन-५ मा रहन परेको थियो।
-copy-1761394385.jpg)
-1746009348.jpg)
