अन्तर्राष्ट्रिय क्रिकेट काउन्सिल (आइसिसी) ले एकदिवसीय र टी-२० विश्वकपलाई नयाँ ढाँचामा खेलाउने भएको छ।
नेपालले लगातार दुई पटक खेलेको टी-२० विश्वकपमा अब पाँच समूह हुनेछ। जसमा एक समूहमा चार टोली हुनेछन्। यसअघि चार समूहमा पाँच पाँच टोली व्यवस्था थियो।
२० टोलीबीच हुने टी-२० विश्वकपको लोकप्रियता र प्रतिस्पर्धालाई ध्यानमा राख्दै आईसीसीले दोस्रो चरणको ढाँचा परिवर्तन गरेको छ।
समूह चरणमा अब २० टोलीलाई ४ वटा समूहको सट्टा ५ वटा समूहमा विभाजन गरिनेछ। प्रत्येक समूहमा ४-४ टोली हुनेछन्। जसमा कुल ३० खेल हुनेछन्।
पहिलेको 'सुपर ८' को सट्टा अब 'सुपर १०' हुनेछ। हरेक समूहका शीर्ष दुई टोलीहरू यस चरणमा पुग्नेछन्। १० टोलीलाई दुई समूहमा बाँडिनेछ।
सुपर १० का दुवै समूहका शीर्षटोली सिधै सेमिफाइनलमा पुग्नेछन्। तर, दोस्रो र तेस्रो स्थानमा रहने टोलीहरूले सेमिफाइनलमा पुग्नका लागि एक-अर्कासँग 'एलिमिनेटर' खेल खेल्नुपर्नेछ। यसले गर्दा अन्तिम समयसम्म खेलको महत्व कायम रहनेछ।
टी-२० विश्वकपको पूर्वतयारी र एसोसिएट राष्ट्रहरूको स्तर उकास्न १६ टोली सम्मिलित एउटा छुट्टै 'ग्लोबल प्रतियोगिता' पनि प्रस्ताव गरिएको छ।
१४ टोली सहभागी हुने एकदिवसीय विश्वकपलाई अब तीन चरणमा विभाजन गरिएको छ, जसले गर्दा सुरुदेखि अन्तिमसम्म हरेक खेल उत्तिकै महत्वपूर्ण हुनेछ।
पहिलो चरणमा पुछारका तीन टोली (१२औं, १३औं र १४औं स्थानका) बीच 'सुपर सिरिज' हुनेछ। यसको विजेता अर्को चरणमा प्रवेश गर्नेछ।
दोस्रो चरणमा १२ टोलीलाई ६-६ को दुई समूहमा बाँडिनेछ। दुवै समूहका शीर्ष ३ टोली र समग्रमा अर्को एक उत्कृष्ट टोली गरी कुल ७ टोली अर्को चरणमा पुग्नेछन्।
तेस्रो चरणमा सातवटा टोलीबीच 'राउन्ड रोबिन' (सबैले सबैसँग खेल्ने) प्रतिस्पर्धा हुनेछ।
सेमिफाइनल र फाइनल: सुपर ७ का शीर्ष ४ टोलीहरू सेमिफाइनलमा प्रवेश गर्नेछन् र त्यसपछि फाइनल हुनेछ।
टी-२० विश्वकप २०२८ को छनोट प्रक्रिया नयाँ हुने भएको छ। सन् २०२८ को टी-२० विश्वकपका लागि छनोटको स्पष्ट मार्गचित्र तयार गरिएको छ।
स्कटल्याण्डले २०२६ को प्रदर्शनका आधारमा सिधै 'युरोप क्षेत्रीय छनोट' को फाइनलमा स्थान पाउनेछ।
२०२६ को विश्वकप खेलेका तर २०२८ का लागि स्वतः छनोट नभएका टोलीहरूले सिधै 'ग्लोबल क्वालिफायर' खेल्न पाउनेछन्। नेपालले पनि स्वत ग्लोबल क्वालिफायर खेल्नेछ।
ग्लोबल क्वालिफायरका बाँकी ८ स्थानहरू क्षेत्रीय छनोटबाट पुग्नेछन्। अफ्रिका, एसिया र युरोपबाट २-२ टोली, तथा अमेरिका र पूर्वी एसिया-प्रशान्त क्षेत्रबाट १-१ टोली छनोटमा हुनेछन्।
ग्लोबल क्वालिफायरमा प्रत्येक क्षेत्रको शीर्ष टोली र अन्य ३ उत्कृष्ट टोली गरी कुल ८ टोली २०२८ को विश्वकपका लागि छनोट हुनेछन्।
