भारतका पूर्वक्रिकेटर रविचन्द्रन अश्विनले विराट कोहली र रोहित शर्मालाई टिमबाट बाहिर राख्नु असम्भव रहेको बताएका छन्।
भारत र इंग्ल्याण्डबीचको तेस्रो तथा अन्तिम एकदिवसीय सिरिजपछि टोलीमा यी दुई ब्याट्सम्यानको स्थानबारे चर्चा भइरहँदा अश्विनले कसैले पनि उनीहरूको स्थान खोस्न नसक्ने दाबी गरेका हुन्।
केही सञ्चारमाध्यमले त्यो खेल रोहितको भारतका लागि अन्तिम हुन सक्ने दाबी गरेका थिए। तर रोहितले १३८ रनको उत्कृष्ट इनिङ्स खेल्दै आलोचकलाई जवाफ दिए। विराटले पनि ७४ रन बनाए।
'यदि विराट र रोहित खेल्न चाहन्छन् भने उनीहरूलाई कसैले छुन सक्दैन। किनभने उनीहरूसँग प्रमाणित उपलब्धि छ, रन बनाएका छन् र उनीहरू महान् ब्याट्सम्यान हुन्,' आश्विनले आफ्नो युट्युब च्यानल ‘आश की बात’मा भने।
उनले रोहितको सम्भावित सन्यासबारे आएका खबरलाई बाहिरी हल्ला मात्र भन्न नमिल्ने पनि बताए।
'आगो नबली धुवाँ हुँदैन। केही न केही दबाब थियो होला, तर रोहितले रन बनाएर कसरी जबाफ दिने भनेर देखाए,' आश्विनले भने।
उनले रोहितले सन् २०२७ को एकदिवसीय विश्वकप खेल्ने विषयमा कुनै शंका नरहेको पनि बताए। 'रोहित र विराटलाई हटाउन सकिँदैन, किनकि दर्शक उनीहरूलाई हेर्न मैदानमा आउँछन्। यदि उनीहरूलाई टोलीबाट हटाइयो भने ठूलो विवाद, आलोचना र जनआक्रोश उत्पन्न हुन सक्छ,' उनले भने।
आश्विनले वरिष्ठ बलरहरूलाई टोलीबाट बाहिर राख्दा भने पर्याप्त चर्चा नहुने गुनासो पनि गरे। उनले मोहम्मद शमी, मोहम्मद सिराज र भुवनेश्वर कुमारको उदाहरण दिँदै भने, 'उनीहरूलाई नछान्दा धेरै मानिसले प्रश्न गर्दैनन्। तर विराट र रोहितलाई बाहिर राख्ने कुरा आयो भने ठूलो आवाज उठ्छ।'
भारतीय क्रिकेट बोर्डले रोहितको अन्तिम खेलबारे आएका समाचारलाई अस्वीकार गरिसकेको छ। तर पछिल्ला कमजोर प्रदर्शन र युवा खेलाडी यशस्वी जयसवाललाई अवसर दिनुपर्ने बहसका कारण रोहितमाथि दबाब बढेको मानिएको थियो।
