श्रीलंकाको लंका प्रिमियर लिग (एलपिएल) को अधिकार प्राप्त संस्था 'इनोभेटिभ प्रोडक्सन ग्रुप' (आइपिजी) र श्रीलंका क्रिकेट (एसएलसी) ले जाफ्ना किंग्सको मालिक 'स्पोर्ट्स कम्युन' सँगको सम्झौता आधिकारिक रूपमा रद्द गरेका छन्।
सह-मालिक मनजोत कालराको गिरफ्तारी र टोलीको आर्थिक अवस्था धराशायी भएपछि उनीहरूबाट स्वामित्व खोसिएको हो।
आइपिजी ले एक विज्ञप्ति जारी गर्दै भनेको छ, ‘सम्झौता अनुसारको आर्थिक दायित्व पूरा गर्न नसकेका कारण यो निर्णय लिइएको हो। अब जाफ्ना किंग्सको सम्पूर्ण अधिकार र सञ्चालन आइपिझी र श्रीलंका क्रिकेटको नियन्त्रणमा रहनेछ।’
टोलीलाई संकटबाट जोगाउन आइपिजी र श्रीलंका क्रिकेटले खेलाडी, प्रशिक्षक र सहयोगी कर्मचारीहरूको अनुबन्ध (कन्ट्र्याक्ट) को जिम्मेवारी आफैँले लिएका छन्।
यसअघि 'स्पोर्ट्स कम्युन' ले प्रायोजन वापतको रकम नदिएपछि, गत जुलाई २२ को खेलमा खेलाडीले विरोध स्वरूप आफ्नो जर्सीमा रहेको प्रायोजकको लोगोलाई कालो टेपले छोपेर मैदान उत्रिएका थिए। हाल आकस्मिक कोषमार्फत खेलाडी र कर्मचारीहरूको लगभग ९० प्रतिशत बाँकी तलब भुक्तानी भइसकेको छ र बाँकी रकम पनि चाँडै दिने प्रतिबद्धता गरिएको छ।
यसका बाबजुद, लंका प्रिमियर लिगको छैटौँ संस्करण पूर्वनिर्धारित तालिका अनुसार नै अघि बढ्ने आइपिजीले जनाएको छ। जाफ्ना किंग्सको नाम, खेलाडी र खेल तालिकामा कुनै परिवर्तन हुने छैन।
सह-मालिक मनजोत कालरालाई श्रीलंकाली अधिकारीहरूले भ्रष्टाचारको आरोपमा पक्राउ गरेपछि यो समस्या सुरु भएको हो। उनी आगामी जुलाई ३१ सम्म न्यायिक हिरासतमा रहनेछन्। अर्का सह-मालिक मयंक गोयल पनि हाल सम्पर्कविहीन रहेको बताइएको छ।
आइपिजीका प्रमुख कार्यकारी अधिकृत अनिल मोहनले भने, ‘यो एक कठिन निर्णय थियो, तर हाम्रो प्राथमिकता लिगको साख बचाउनु र खेलाडी तथा प्रशिक्षकहरूको भविष्य सुरक्षित गर्नु हो। जाफ्ना किंग्सले कुनै अवरोध बिना प्रतियोगिता जारी राख्ने कुरामा हामी सबैलाई आश्वस्त पार्न चाहन्छौँ। हामी एक विश्वस्तरीय प्रतियोगिता आयोजना गर्न पूर्ण रूपमा प्रतिबद्ध छौँ।’
-1746009348.jpg)
