नेपाल क्रिकेट संघ (क्यान) ले आयोजना गर्न लागेको नेपाल प्रिमियर लिग (एनपिएल) को तेस्रो संस्करणको तयारी तीव्र गतिमा अगाडि बढेको छ। यसै क्रममा क्यानका सचिव पारस खड्काले एनपिएलमा प्रविधि प्रयोग, आइसिसीको औपचारिक स्वीकृति, अन्तर्राष्ट्रिय स्टार खेलाडीहरूको सहभागिता र प्रसारणका विषयमा महत्त्वपूर्ण जानकारी दिएका छन्।
एनपिएलमा पहिलोपटक डिआरएस प्रविधिको परीक्षण
नेपाली क्रिकेट समर्थकहरूको बहुप्रतीक्षित मागलाई सम्बोधन गर्दै एनपिएलमा निर्णय समीक्षा प्रणाली डिआरएस भित्र्याउन क्यानले प्राविधिक परीक्षण सम्पन्न गरेको छ। क्यान सचिव खड्काका अनुसार दुईवटा प्रविधि प्रदायक कम्पनीहरूसँग टोलीको अपरेसन राखेर प्राविधिक परीक्षण पूरा गरिसकिएको छ।
परीक्षण गरिएको प्रविधिको नतिजा र एक्युरेसीका विषयमा सबै टोलीहरूसँग फिडब्याक लिने काम भइरहेको छ। प्रोडक्सनको अन्तिम टुङ्गो लागेपछि कुन कम्पनीको डिआरएस प्रविधि प्रयोग गर्ने भन्नेबारे क्यानले निर्णय लिनेछ। आइसिसी विश्वकप स्तरको उच्चस्तरीय डिआरएसका लागि पर्याप्त स्रोत साधन नभए पनि, परीक्षण गरिएको प्रविधि उपयोगी ठहरिएमा यसै संस्करणदेखि नेपालमा पहिलोपटक डिआरएस लागू गरिनेछ।
आइसिसीको स्वीकृति र विश्वप्रसिद्ध स्टार खेलाडीको सहभागिता
एनपिएललाई आइसिसीबाट टी-२० लिगको औपचारिक मान्यता र स्वीकृति प्राप्त हुने प्रक्रिया अन्तिम चरणमा रहेको छ। आइसिसीको औपचारिक स्वीकृति आउनासाथ लिगका टोलीहरूले आफूले आबद्ध गरेका विदेशी खेलाडीको नाम औपचारिक रूपमा घोषणा गर्नेछन्।
यस संस्करणमा विश्व प्रसिद्ध खेलाडीहरू साकिब अल हसन, सिकन्दर रजा, रवि बोपारा र डेभिड वार्नर जस्ता स्टारहरूले सम्झौता गरिसकेका छन्।
स्टार स्पोर्ट्समा लाइभ प्रसारण र ब्रान्ड भ्यालुमा वृद्धि
यसपटक एनपिएलको ब्रान्ड भ्यालु र नेपाली क्रिकेटको इज्जत अन्तर्राष्ट्रिय स्तरमा अझ उच्च बनेको छ। मिडिया राइट्समा राम्रो प्रतिस्पर्धा भएकाले क्यानको आम्दानी र लिगको व्यावसायिक पक्ष मजबुत बनेको छ।
एनपिएलको प्रत्यक्ष प्रसारण अन्तर्राष्ट्रिय स्तरमा स्टार स्पोर्ट्समा हुनेछ भने नेपालमा हिमालय टिभी र ओटीटी प्लेटफर्म नेट टिभीमार्फत प्रत्यक्ष हेर्न सकिनेछ।
कात्तिक ९ देखि त्रिवि मैदानमा क्रिकेटको महाकुम्भ
एनपिएलको तेस्रो संस्करण कात्तिक ९ (अक्टोबर २६) देखि मंसिर ५ (नोभेम्बर २१) सम्म काठमाडौँस्थित त्रिवि अन्तर्राष्ट्रिय क्रिकेट मैदानमा आयोजना हुँदैछ। उद्घाटन खेलमा लुम्बिनी लायन्स र सुदूरपश्चिम रोयल्स आमनेसामने हुनेछन्।
टेस्ट राष्ट्रसँगो सिरिज र क्यानको आगामी रणनीति
नेपाली टोलीको क्षमता अभिवृद्धिका लागि क्यानले भारत 'ए' र बङ्गलादेश टोलीसँगको शृङ्खला पक्का गरिसकेको छ। यसका साथै सन् २०२७ सम्म अन्य टेस्ट राष्ट्रहरूलाई नेपालमै ल्याएर खेलाउनका लागि विभिन्न प्रस्तावहरू पठाइएको र क्यानले रणनीतिक तयारी गरिरहेको छ।
-1746009348.jpg)
