रियल म्याड्रिड ला लिगाको उपाधितर्फ अघि बढेको छ। शनिबार साँझ भएको खेलमा एथ्लेटिक बिल्बाओलाई पराजित गरेको रियल अब उपाधिबाट तीन जित टाढा छ।
रियलले एथ्लेटिकलाई १-० गोलले पराजित गर्यो। रियलको जितमा सर्जियो रामोसले निर्णायक गोल गरे।
उनले ७३ मिनेटमा पेनाल्टीमार्फत गोल गरेका हुन्। मार्सेलोलाई ड्यानी गार्सियाले फल गरेपछि भारमार्फत रियलले पेनाल्टी पाएको थियो।
रामोसले देश र क्लबका लागि प्रहार गरेको पछिल्ला २२ पेनाल्टीमा निरन्तर गोल गर्न सफल भए। उनले पछिल्ला सात खेलमा पाँच गोल गरिसकेका छन्।
आइतबार राति दोस्रो स्थानको बार्सिलोनाले भिल्लारियलसँग खेल्दैछ। जित हात पारे बार्सिलोनाले रियलसँगको अंक दूरी चारमा झार्नेछ।
अब रियलले बाँकी रहेका चार मध्ये तीन खेलमा जित हात पारे बार्सिलोनालाई पछि पारेर ला लिगाको उपाधि जित्नेछ।