पुर्ख्यौली घर कीर्तिपुर भएका प्रकाश नकर्मी वैदेशिक रोजगारीमा गएको २५ वर्ष भयो। उनी संयुक्त अरब इमिरेट्स (युएई) को दुबई सहरमा बस्छन्।
उनी पाँच वर्षदेखि भालोर हस्पिटालिटी कम्पनीमा इन्जिनियरिङ विभाग प्रमुखका रूपमा काम गर्दै आएका छन्।
'म सात वटा होटलको सुपरिवेक्षण गर्छु,' इन्जिनियर प्रकाशले भने।
भालोर हस्पिटालिटी होटल म्यानेजमेन्ट कम्पनी हो। यो कम्पनी मातहतका अकोर ब्रान्डका पाँच वटा र र्याडिसन ब्रान्डका दुइटा गरी सात वटा होटलको सुपरिवेक्षण आफूले गर्ने उनले बताए। यी दुईदेखि पाँचतारे होटल हुन्।
होटलमा इन्जिनियरिङ विभाग प्रमुखको मुख्य जिम्मेवारी भौतिक र प्राविधिक संरचना ठीक अवस्थामा राख्नु हो। होटल भवन, अतिथि कोठा, भान्सा, लबी लगायत भागमा देखिने समस्या प्रकाश समाधान गर्छन्।
'होटलमा प्रयोग हुने बिजुली, पानी, हावा प्रवाह तथा चिस्यान नियन्त्रण प्रणाली, लिफ्ट र जेनेरेटर नियमित रूपमा सञ्चालन भइरहेको छ कि छैन भन्ने निगरानी गर्नुपर्छ,' उनले भने।
यसरी होटलको सेवा गुणस्तर, सुरक्षा र सहज सञ्चालन सुनिश्चित गर्न इन्जिनियरिङ विभागमा प्रकाश सहित २० जना कर्मचारी छन्।
प्रकाश विदेश जानुअघि पोखरास्थित एक निर्माण (कन्स्ट्रक्सन) कम्पनीमा सुपरभाइजरका रूपमा काम गर्थे। आमाबुबा कीर्तिपुर बस्ने भएकाले उनको पोखरा–कीर्तिपुर आउजाउ भइरहन्थ्यो।
आफ्नै देशमा गरिखाने सोच राखेका प्रकाशले विदेश जाने कल्पनै गरेका थिएनन्।
एक दिन साथीहरूले प्रकाशलाई दुबई जाने प्रस्ताव राखे। सुरूमा उनले खासै चासो देखाएनन्। पछि साथीहरूले इन्जिनियरिङ क्षेत्रमै जागिर खुलाएको छ भनेपछि चासो बढ्यो। उनले एक कम्पनीमा अन्तर्वार्ता दिए।
'त्यो होटल म्यानेजमेन्ट कम्पनी नै थियो। कम्पनीकै प्रतिनिधि आएर अन्तर्वार्ता लिएका थिए,' उनले सुनाए।
सो पदका लागि करिब तीन सय जनाले अन्तर्वार्ता दिएका थिए। प्रकाश मात्रै छानिए। प्रतिस्पर्धाबीच नाम निस्किएपछि केही समय विदेशमा काम गरेर फर्किने सोचे।
अनि सन् २००० अप्रिलमा प्रकाश दुबई उडे।
इन्जिनियरिङ सुपरभाइजर पदमा गएका उनले खाने, बस्ने सुविधा सहित मासिक दुई हजार दिराम पाउँथे।
सुरूआती दिनमा प्रकाशलाई काम गर्न केही असहज भयो। उनले कहिल्यै नदेखेका प्रविधिमा देखिएका समस्या समाधान गर्नुपर्थ्यो।
'त्यो बेला नेपालमा लिफ्टहरू एकदमै कम थिए। लिफ्ट आकर्षक भएकाले चढ्न पनि काठमाडौं मल, विशाल बजार जाने चलन थियो,' प्रकाशले भने, 'त्यस्तो ठाउँबाट आएको मलाई दुबईमा कहिल्यै नदेखेको लिफ्ट, एयर कन्डिसनर (एसी) सुपरिवेक्षण गर्नुपर्दा धेरै गाह्रो भयो।'
काम गर्न समस्या भए पनि उनी आत्तिएनन्। ती सबै काम कहाँ सिक्न पाइन्छ भनेर इन्टरनेटमा ठाउँ खोजी गरे। एक तालिम केन्द्र पुगे। तालिम लिँदै, सिक्दै जाँदा उनी काममा पोख्त हुँदै गए।
'आफै पैसा खर्च गरेर तालिम लिएँ। नयाँ प्रविधिसँगको काम सिक्दै गएँ,' प्रकाशले भने।
उनी सुरूमा गएको कम्पनीका १३ वटा होटल थिए। सुरूमा एउटा होटलमा काम थालेका प्रकाश पछि सबै होटलका इन्चार्ज भए।
उनले त्यो कम्पनीमा दस वर्ष काम गरे। त्यसपछि उनलाई विन्डम होटल ग्रुपबाट जागिरको प्रस्ताव आयो। तलब सुविधा राम्रो भएपछि उनी त्यहाँ चिफ इन्जिनियरका रूपमा काम गर्न थाले।
सो कम्पनीले दुबईमा भर्खरै रामडा होटल सञ्चालनमा ल्याएको थियो।
'यो ग्रुपका संसारभर ९ हजार वटा होटल छन्। युएईमै ९० वटा होटल छ। रामडा, डेज वाई विन्डम, सुपर–८ बाई विन्डम, ट्रिप बाई विन्डम मुख्य चल्तीका हुन्,' प्रकाशले भने।
प्रकाश कामकै सिलसिलामा साउदी अरब, अफ्रिका, जर्जिया लगायत देश पनि पुगे। उनले सो कम्पनीमा दस वर्ष काम गरे। त्यसपछि सन् २०२० देखि उनी भालोर हस्पिटालिटीसँग जोडिएका हुन्।
उनले होटल क्षेत्रको प्राविधिक पाटो सम्हालेका कारण 'गोल्डेन विनर' को उपाधि पनि पाएका थिए।
अहिले प्रकाशका आमाबुबा कीर्तिपुरमा र श्रीमती, सन्तान दुबईमा बस्छन्। बिदा मिलाएर उनीहरू वर्षमा चार–पाँच पटक नेपाल आउँछन्।
आएका बेला उनी यहाँका होटलहरू घुम्न रूचाउँछन्। आफूले काम गरेको अन्तर्राष्ट्रिय चेन होटल यहाँ देख्दा खुसी लाग्ने उनले बताए।
'रामडा इनकोर र मर्क्योर यहाँ खुलेको देख्दा खुसी लाग्छ,' उनले सुनाए, 'पछिल्लो समय नेपालमा होटल क्षेत्रमा उल्लेखनीय प्रगति भएको छ। विदेशको तुलनामा यहाँ ठाउँ अभाव भएकाले संरचना साना भए पनि सेवा र सुविधा फरक हुँदैन। चेन होटल भनेपछि विदेशको र यहाँको सुविधा एउटै हो।'
अन्तर्राष्ट्रिय चेन होटलको संख्या बढ्दै जानु नेपालको पर्यटन क्षेत्रको प्रगतिको संकेत भएको प्रकाशको भनाइ छ।
दुबईबाट अवकाश लिएपछि नेपालमै प्राविधिक फर्म सञ्चालन गर्ने प्रकाशको योजना छ।
'विदेश जाने खासै मन थिएन, जान लेखेको रहेछ भन्ने लाग्छ,' प्रकाशले भने, '२५ वर्ष उमेरमा आएको थिएँ, अहिले दोब्बर भएँ।'
-1746009348.jpg)
