आगामी वर्ष कतारमा हुने फिफा विश्वकप २०२२ अन्तर्गत युरोपेली छनोटको प्लेअफमा पोर्चुगल र इटाली एउटै समूहमा परेका छन्।
योसँगै दुई राष्ट्रमध्ये एउटाले मात्र विश्वकपमा खेल्न पाउने भएका छन्।
शुक्रबार भएको ड्रमा पोर्चुगल,टर्की, उत्तर म्यासेडोनिया र इटाली समूह सीमा परेका हुन् । इटाली र उत्तर म्यासेडोनिया तथा पोर्चुगल र टर्कीको विजेता फाइनलमा भिड्नेछन्। विजेताले विश्वकपमा स्थान बनाउनेछ।
यस्तै प्लेअफको समूह ए मा स्कटल्याण्ड र युक्रेन तथा वेल्स र अष्ट्रिया भिड्नेछन् । यी दुई खेलको विजेताले फाइनल खेल्नेछन् । उक्त खेलको विजेता विश्वकपमा पुग्नेछ ।
समूह बीमा रुस र पोल्यान्ड तथा स्विडेन र चेक गणतन्त्र खेल्नेछन्। यी दुईको विजेताबीच हुने फाईनल जित्ने टोली कतार विश्वकपमा लागि छनोट हुनेछ।
यसअघि कतार विश्वकपमा आयोजक कतारसहित १३ राष्ट्रले स्थान पक्का गरिसकेका छन्।
