डेभिड वार्नरको उत्कृष्ट अर्धशतकका बाबजुद अन्तिम ओभरहरूमा लगातार विकेट गुमाएपछि काठमाडौं गोर्खाजले नेपाल प्रिमियर लिग (एनपीएल) अन्तर्गत लुम्बिनी लायन्सलाई १६१ रनको लक्ष्य दिएको छ।
त्रिवि क्रिकेट मैदानमा शनिबार टस हारेर पहिले ब्याटिङ गरेको काठमाडौंले निर्धारित २० ओभरमा ८ विकेट गुमाएर १६० रन बनायो।
काठमाडौंका लागि वार्नरले सर्वाधिक ६६ रन बनाए। उनले ५० बलमा ९ चौका र एक छक्का प्रहार गरे। साहिल पटेलले ३६ बलमा ३८ रन बनाए। यी दुईले पहिलो विकेटका लागि १०४ रनको उत्कृष्ट साझेदारी गर्दै काठमाडौंलाई बलियो सुरुवात दिलाएका थिए।
काठमाडौंले पहिलो विकेटका रूपमा साहिललाई १३.२ ओभरमा गुमाएको थियो। त्यसबेला टोलीको स्कोर १०४ रन थियो। त्यसपछि वार्नर र कप्तान करण केसीले पारी अघि बढाए पनि लुम्बिनीका बलरले लगातार दबाब सिर्जना गरे।
१५.५ ओभरमा शेर मल्लले वार्नरलाई सन्दीप जोराको हातबाट क्याच गराएपछि काठमाडौंको इनिङ्सले अप्रत्याशित मोड लियो। त्यसको अर्को बलमा मल्लले दुई रन दिए।
त्यसपछि १६.१ ओभरमा अभिषेश गौतमले करण केसीलाई ९ रनमा आउट गरे। लगत्तै १६.२ ओभरमा विल बोसिस्टोलाई खाता खोल्न नदिई बोल्ड गरे। यसरी चार बलको अन्तरमा काठमाडौंले वार्नर, करण र बोसिस्टो गरी तीन महत्वपूर्ण विकेट गुमायो।
एक समय १०४ रनमा विकेट नगुमाएको काठमाडौंले ११७ रन पुग्दा चार विकेट गुमाइसकेको थियो। अर्थात् १३ रन जोड्दा तीन विकेट गुमेपछि काठमाडौंको रनगति र इनिङ्स दुवैमा धक्का लाग्यो।
त्यसपछि पनि काठमाडौंले सम्हालिएर खेल्न सकेन। १८.१ ओभरमा राशिद खान १ रनमा आउट भए भने १८.४ ओभरमा जहानदाद खान ६ रन बनाएर फर्किए। अन्तिम ओभरमा पनि दुई विकेट गुमाएको काठमाडौंले अन्तिम पाँच ओभरमा ४६ रन जोड्दा सात विकेट गुमायो।
अन्तिमतिर आक्रामक ब्याटिङ गरेका शेहान अराचिगे भने १५ बलमा ३ चौका र एक छक्कासहित ३४ रनमा अविजित रहे। भीम सार्की शून्यमा अविजित रहे।
लुम्बिनीका लागि अभिषेश गौतमले ४ ओभरमा १५ रन खर्चेर २ विकेट लिए। शेर मल्लले ४ ओभरमा १९ रन दिएर २ विकेट हात पारे। रुबेन ट्रम्पलमेनले पनि ३ ओभरमा २४ रन खर्चेर २ विकेट लिए।
विशेषगरी वार्नर र साहिलको शतकीय साझेदारीपछि काठमाडौं ठूलो योगफलतर्फ अघि बढेको देखिएको थियो। तर मध्यक्रममा लगातार विकेट गुमाउँदा टोली १६० रनमै सीमित भयो।
