साविक विजेता लुम्बिनी लायन्सको नेपाल प्रिमियर लिग (एनपिएल) मा १० खेलसम्म कायम रहेको अपराजित यात्रामा पूर्णविराम लागेको छ। शनिबार त्रिवि क्रिकेट मैदानमा काठमाडौं गोर्खाजले लुम्बिनीलाई ३६ रनले पराजित गर्दै उसको अपराजित यात्रामा ब्रेक लगाएको हो।
काठमाडौंले दिएको १६१ रनको लक्ष्य पछ्याएको लुम्बिनी १९.३ ओभरमा १२४ रनमै अलआउट भयो।
लुम्बिनीको ब्याटिङ सुरुवातदेखि नै धराशायी बन्यो। पहिलो ओभरदेखि नै विकेट गुमाउन थालेको लुम्बिनीले पावरप्लेभित्रै ६ विकेट गुमाएको थियो। पहिलो ६ ओभरमा टोलीले ३४ रन मात्रै बनाउन सक्यो।
ओपनर डार्सी सर्ट ४ र आशिफ शेख १ रनमा आउट भए। निरोसन डिक्वेलाले ७ बलमा १४ रन बनाए पनि टिक्न सकेनन्। कप्तान रोहितकुमार पौडेल खाता नखोली फर्किए। दिलीप नाथ र ग्रान्ट स्टेवार्ट पनि सस्तैमा आउट भएपछि लुम्बिनी २८ रनमा ६ विकेट गुमाएको दयनीय अवस्थामा पुग्यो।
त्यसपछि सन्दीप जोराले एक छेउबाट इनिङ्स सम्हाल्ने प्रयास गरे। उनले ४५ बलमा ३ चौकासहित ४४ रन बनाए। तर अर्को छेउबाट उनलाई पर्याप्त साथ मिलेन।
रुबेन ट्रम्पलमेनले ११ र अभिषेक गौतमले १७ बलमा १६ रन बनाए। शेर मल्लले १५ बलमा १२ रन जोडे। जोराले आठौं विकेटका लागि गौतमसँग ४६ रनको साझेदारी गर्दै टोलीलाई केही आशा दिलाएका थिए। तर १४.४ ओभरमा गौतम आउट भएपछि लुम्बिनी पुनः दबाबमा आयो।
जोराको विकेट १७.४ ओभरमा ९५ रन हुँदा झरेपछि लुम्बिनीको जितको सम्भावना लगभग समाप्त भयो। अन्तिमतिर शेर मल्लले केही प्रतिरोध गरे पनि टोलीलाई हारबाट जोगाउन सकेनन्।
काठमाडौंका लागि जहानदाद खान सर्वाधिक सफल बलर बने। उनले ४ ओभरमा २३ रन खर्चेर ४ विकेट लिए। करण केसीले २४ रन दिएर २ विकेट हात पारे। शहाब आलम, सन्तोष यादव, राशिद खान र शेहान अराचिगेले समान एक विकेट लिए।
यसअघि टस हारेर पहिले ब्याटिङ गरेको काठमाडौंले निर्धारित २० ओभरमा ८ विकेट गुमाएर १६० रन बनाएको थियो।
काठमाडौंका लागि डेभिड वार्नरले ५० बलमा ९ चौका र एक छक्कासहित ६६ रन बनाए। साहिल पटेलले ३६ बलमा ३८ रन जोडे। यी दुईले पहिलो विकेटका लागि १३.१ ओभरमा १०४ रनको साझेदारी गरेका थिए।
१२ ओभरमा १०० रन पूरा गरेको काठमाडौं बलियो अवस्थामा थियो। तर १५.५ ओभरमा वार्नर ६६ रनमा आउट भएपछि काठमाडौंको इनिङ्समा ठूलो धक्का लाग्यो। त्यसपछि चार बलको अन्तरमा कप्तान करण केसी (९) र विल बोसिस्टो (०) आउट भए। १०४ रनको साझेदारी गरेको काठमाडौंले १३ रन जोड्दा तीन विकेट गुमाएको थियो।
एक समय ठूलो योगफलतर्फ अघि बढेको काठमाडौंले अन्तिम पाँच ओभरमा ४६ रन जोड्दा सात विकेट गुमायो। शेहान अराचिगेले १५ बलमा ३४ रनको आक्रामक अविजित इनिङ्स खेलेपछि काठमाडौं १६० रनसम्म पुग्न सफल भयो।
लुम्बिनीका लागि अभिषेक गौतम, शेर मल्ल र रुबेन ट्रम्पलमेनले समान दुई विकेट लिए। तर ब्याटिङमा कमजोर प्रदर्शन गर्दा उनीहरूको बलिङ प्रयास जितका लागि पर्याप्त हुन सकेन।
यो हारसँगै लुम्बिनीको एनपीएलमा लगातार १० खेलसम्मको अपराजित यात्रा टुंगिएको छ। अघिल्लो संस्करणको समूह चरणका अन्तिम तीन खेल जितेको लुम्बिनीले फाइनलसमेत जित्दै उपाधि उचालेको थियो। यस सिजन पनि सुरुवाती चार खेलमध्ये तीनमा जित निकालेको थियो भने एक खेल वर्षाका कारण रद्द भएको थियो।
यसरी अघिल्लो संस्करणका तीन समूह चरणका जित, फाइनलको जित र यस सिजनका चार खेलमा अपराजित रहेको लुम्बिनीको यात्रामा काठमाडौंले पूर्णविराम लगाएको हो।
-1794063759.jpg)
