नेपाल प्रिमियर लिग (एनपीएल) मा पहिलो हार बेहोरेपछि लुम्बिनी लायन्सका कप्तान रोहितकुमार पौडेलले पावर प्लेमा ६ विकेट गुमाउनु नै पराजयको मुख्य कारण भएको बताएका छन्।
शनिबार काठमाडौं गोर्खाजसँग ३६ रनले पराजित भएपछि बोल्दै रोहितले खेलमा जित र हार स्वाभाविक प्रक्रिया भएको बताए। उनले हारबाट निराश हुनुभन्दा आगामी खेलमा राम्रो प्रदर्शन गर्न केन्द्रित हुनुपर्ने धारणा राखे।
‘खेलकुदमा जित र हार दुवै हुन्छन्। हामीले यसलाई स्वीकार गरेर अघि बढ्नुपर्छ। अझै पनि हाम्रो लागि प्लेअफमा पुग्ने र शीर्ष दुईमा रहने राम्रो अवसर छ,’ उनले भने।
१६१ रनको लक्ष्य पछ्याउने क्रममा लुम्बिनीले १९.३ ओभरमा १२४ रन मात्रै बनाउन सक्यो। टोलीले पावर प्लेभित्रै ६ विकेट गुमाएको थियो। कप्तान रोहितले पनि सुरुवाती ६ विकेट गुमाउनु टोलीका लागि ठूलो क्षति भएको स्वीकार गरे।
उनका अनुसार लुम्बिनीले उक्त पिचमा १६० रनलाई प्रतिस्पर्धात्मक योगफल मानेको थियो। तर सुरुवाती विकेट गुमाउँदा योजनाअनुसार ब्याटिङ गर्न सकेन।
‘हामीले यो विकेटमा १६० रन राम्रो योगफल हुन सक्छ भन्ने सोचेका थियौं। तर पावर प्लेमा ६ विकेट गुमाउनु हाम्रा लागि ठूलो क्षति भयो,’ उनले भने।
रोहितले ब्याटिङसँगै बलिङमा पनि अपेक्षाअनुसार प्रदर्शन गर्न नसकेको स्वीकार गरे। विशेषगरी पहिलो १० ओभरमा बलिङ योजनाको कार्यान्वयन कमजोर भएको उनको भनाइ थियो। उनले उक्त अवधिमा काठमाडौंका डेभिड वार्नरले आफ्नो अनुभव देखाएको पनि बताए।
काठमाडौंले पहिलो १० ओभरमा विकेट नगुमाई ९० रन बनाएको थियो। वार्नर र साहिल पटेलले पहिलो विकेटका लागि १०४ रनको साझेदारी गरेका थिए। वार्नरले ६६ तथा साहिलले ३८ रन बनाएका थिए।
हारको समीक्षा गर्दै रोहितले ब्याटिङको माथिल्लो क्रमका चार वा पाँच खेलाडीले जिम्मेवारीपूर्वक खेल्नुपर्ने बताए। सुरुवातमै विकेट गुमाउँदा तल्लो क्रमका ब्याटरमाथि अनावश्यक दबाब सिर्जना हुने उनको विश्लेषण थियो।
उनले आगामी खेलमा खेलको आवश्यकता र पिचको अवस्थाअनुसार ब्याटिङ क्रम तथा टोली संयोजनमा परिवर्तन हुन सक्ने पनि बताए। विशेषगरी बल टर्न हुने पिचमा बायाँ र दायाँ हाते ब्याटरको संयोजनलाई ध्यान दिइने उनको भनाइ थियो।
‘टोलीको आवश्यकता सबैभन्दा महत्वपूर्ण हुन्छ। व्यक्तिगत भूमिकाभन्दा पनि टिमलाई के आवश्यक छ भन्ने कुराले हाम्रो निर्णय निर्धारण गर्छ,’ उनले बताए।
लगातारको जितपछि पहिलो हार बेहोरेको लुम्बिनीले अब बाँकी खेलमा आफ्नो उत्कृष्ट क्रिकेट खेल्ने लक्ष्य राखेको छ। रोहितले हारलाई बिर्सेर आगामी प्रतिस्पर्धात्मक खेलमा केन्द्रित हुने बताए।
