नेपाल प्रिमियर लिग (एनपिएल) सिजन ३ मा सुदूरपश्चिम रोयल्सले काठमाडौं गोर्खाजलाई ७ रनले पराजित गर्दै प्लेअफमा स्थान पक्का गरेको छ। अघिल्ला दुई सिजनको फाइनलमा पराजित भएको सुदूरपश्चिम लगातार तेस्रो सिजन प्लेअफमा पुगेको हो।
शुक्रबार कीर्तिपुरस्थित त्रिवि क्रिकेट मैदानमा १२६ रनको लक्ष्य पछ्याएको काठमाडौंले निर्धारित २० ओभरमा ७ विकेट गुमाएर ११८ रन मात्रै बनाउन सक्यो।
अन्तिम ओभरमा जितका लागि १६ रन आवश्यक हुँदा काठमाडौंका जाहान्दाद खान र राशिद खान क्रिजमा थिए। बलिङमा आएका हेमन्त धामीले उत्कृष्ट संयम देखाउँदै सुदूरपश्चिमलाई जित दिलाए। जाहान्दाद र राशिदले अन्तिम ओभरमा कुनै चौका वा छक्का प्रहार गर्न सकेनन्।
धामीले पहिलो बल नो बल फाले पनि त्यसपछिका बलमा काठमाडौंका ब्याटरलाई ठूलो प्रहार गर्न दिएनन्। उनले पाँचौं बल वाइड फालेका थिए। अतिरिक्त रन दिए पनि धामीले चौका र छक्का रोक्दै सुदूरपश्चिमको जित सुनिश्चित गरे।
यसअघि टस हारेर पहिले ब्याटिङ गरेको सुदूरपश्चिमले २० ओभरमा ६ विकेट गुमाएर १२५ रन बनाएको थियो।
सुदूरपश्चिमको सुरुवात निकै खराब रह्यो। टोलीले ८ रन जोड्दा चार विकेट गुमाएको थियो। स्कट कुगेलेइन (६), विनोद भण्डारी (१), ब्रेन्डन म्याकमुलन (०) र इशान पाण्डे (०) सस्तैमा आउट भए।
तर कप्तान दीपेन्द्रसिंह ऐरीले एक छेउबाट इनिङ्स सम्हाले। उनले आरिफ शेखसँग पाँचौं विकेटका लागि ५४ रनको महत्वपूर्ण साझेदारी गरे। आरिफ २५ बलमा १६ रन बनाएर रनआउट भए।
त्यसपछि दीपेन्द्रले थारिन्दु रत्नायकेसँग छैटौं विकेटका लागि थप ५४ रनको साझेदारी गरे। यही दुई साझेदारी सुदूरपश्चिमको इनिङ्स उकास्ने आधार बने।
दीपेन्द्रले ५५ बलमा ५ चौका र २ छक्कासहित ६० रन बनाए। उनी अन्तिम ओभरको अन्तिम बलमा आउट भए। थारिन्दु २३ बलमा ३ चौकासहित २६ रनमा अविजित रहे।
काठमाडौंका जाहान्दाद खानले ४ ओभरमा २२ रन खर्चेर ३ विकेट लिए। सन्तोष यादवले १६ रन दिएर २ विकेट हात पारे।
१२६ रनको लक्ष्य पछ्याएको काठमाडौंको सुरुवात पनि राम्रो हुन सकेन। टोलीले १२ रन जोड्दा दुई विकेट गुमाएको थियो। भीम सार्की पहिलो ओभरमै आउट भए भने साम हेजलेट ११ रन बनाएर रनआउट भए।
त्यसपछि मोहम्मद आदिल आलम र सन्तोष यादवले तेस्रो विकेटका लागि २९ रनको साझेदारी गर्दै इनिङ्स सम्हाल्ने प्रयास गरे। सन्तोष १० रनमा आउट भए। लगत्तै साहान आराचिगे शून्यमा आउट भएपछि काठमाडौं ४४ रनमा चार विकेट गुमाएको अवस्थामा पुग्यो।
मोहम्मद आदिल आलम पनि ८ रन बनाएर आउट हुँदा काठमाडौंले ४८ रनमै पाँच विकेट गुमाइसकेको थियो।
त्यसपछि राशिद खान र दुशन हेमन्थाले छैटौं विकेटका लागि ३४ रन जोड्दै काठमाडौंलाई खेलमा फर्काउने प्रयास गरे। हेमन्था १८ बलमा २१ रन बनाएर रनआउट भए।
राशिद र कप्तान करण केसीले सातौं विकेटका लागि २२ रनको साझेदारी गरे। करण ८ रन बनाएर आउट भएपछि काठमाडौंको जित कठिन बनेको थियो।
राशिदले ३१ बलमा ५ चौकासहित अविजित ३५ रन बनाए। जाहान्दाद खान ५ रनमा अविजित रहे। तर अन्तिम ओभरमा आवश्यक रन जोड्न नसक्दा काठमाडौं जितबाट ७ रन टाढा रह्यो।
सुदूरपश्चिमका अनिल खरेलले १८ रन खर्चेर २ विकेट लिए। स्कट कुगेलेइन, फाबियन एलेन र हेमन्त धामीले समान एक विकेट लिए।
यो जितसँगै सुदूरपश्चिम लिग चरणका सबै खेल सकाएर १० अंक जोड्दै अंकतालिकाको शीर्ष स्थानमा पुगेको छ। ऊ प्लेअफ पुग्ने दोस्रो टोली बनेको छ। यसअघि लुम्बिनी लायन्सले ९ अंकसहित प्लेअफमा स्थान बनाइसकेको छ।
काठमाडौंको प्लेअफ सम्भावना भने कायमै छ। ८ अंक जोडेको काठमाडौंले लिग चरणको अन्तिम खेल खेल्न बाँकी छ। अन्तिम खेलमा पराजित भए पनि नेट रनरेटका आधारमा प्लेअफ पुग्ने सम्भावना उसँग रहनेछ।
