सुदूरपश्चिम रोयल्सका तीव्र गतिका बलर हेमन्त धामीले कम योगफल रक्षा गर्दा पनि आफ्नो टोली दबाबमा नपर्ने बताएका छन्।
नेपाल प्रिमियर लिग (एनपिएल) सिजन ३ अन्तर्गत शुक्रबार काठमाडौं गोर्खाजलाई ७ रनले पराजित गरेपछि प्रतिक्रिया दिँदै धामीले टोलीको बलिङ युनिट बलियो भएकाले कम योगफलमा पनि जित निकाल्न सक्ने आत्मविश्वास रहेको बताए।
उनले अनिल खरेलजस्ता खेलाडीको प्रदर्शनले टोलीको बलिङलाई थप मजबुत बनाएको उल्लेख गरे।
धामीका अनुसार टोलीले पिचको अवस्थालाई राम्रोसँग बुझेर बलिङ रणनीति बनाउने गरेको छ। पिचमा टर्न हुने अवस्था रहेकाले तीव्र गतिमा बलिङ गर्नुभन्दा कटर र स्लोअर बल प्रयोग गर्दा ब्याटरलाई रन बनाउन कठिन हुने उनको भनाइ छ।
‘पिचले बललाई ग्रिप र टर्न गराइरहेको अवस्थामा हामी आफ्नो बलिङ शैली परिवर्तन गर्छौं। यस्तो अवस्थामा बढी गति दिनुभन्दा कटर र स्लोअर बल प्रयोग गर्नु प्रभावकारी हुन्छ,’ उनको भनाइको आशय थियो। यस्तै यो पिचमा ब्याटिङ गर्न सजिलो नभएको पनि बताए।
पिचकै कारण पछिल्ला खेलहरूमा १२० देखि १३० सम्मको स्कोर पनि डिफेन्ड भइरहेको अवस्था छ।
उनले पिचको अवस्था बुझेर बलिङ गर्न सके कम योगफल पनि रक्षा गर्न सकिने बताए। बलिङ युनिटको सामूहिक प्रदर्शन र रणनीतिमा विश्वास रहेकाले टोलीले कम स्कोर हुँदा पनि दबाब महसुस नगर्ने उनको भनाइ छ।
शुक्रबार काठमाडौंविरुद्ध सुदूरपश्चिमले १२६ रनको लक्ष्य दिएको थियो। तर काठमाडौंलाई २० ओभरमा ७ विकेटको क्षतिमा ११८ रनमा रोक्दै सुदूरपश्चिमले ७ रनको जित निकाल्यो।
यसअघि सुदूरपश्चिमले ८ रनमै चार विकेट गुमाएको अवस्थामा कप्तान दीपेन्द्रसिंह ऐरीको ६० रनको मद्दतमा १२५ रन बनाएको थियो।
अन्तिम ओभरमा काठमाडौंलाई जितका लागि १६ रन आवश्यक थियो। हेमन्त धामीले अन्तिम ओभरमा चौका र छक्का नदिई सुदूरपश्चिमको जित सुनिश्चित गरेका थिए।
