उत्तर अमेरिकामा आयोजना हुन लागेको २०२६ को विश्वकपमा इंग्लिस क्लब म्यानचेस्टर सिटीले नयाँ कीर्तिमान राख्ने भएको छ।
यस विश्वकपमा सिटीका सबैभन्दा धेरै १९ जना खेलाडीहरूले आ-आफ्नो देशको प्रतिनिधित्व गर्दै खेल्नेछन्। यो विश्वभरकै कुनै पनि क्लबका लागि सबैभन्दा ठूलो संख्या हो।
म्यानचेस्टर सिटीका मुख्य खेलाडीमा इङ्ल्यान्डबाट गोलकिपर जेम्स ट्राफोर्ड, डिफेन्डर मार्क गुएही, निको ओ'रेली र जोन स्टोन्स। यस्तै पोर्चुगलमा कप्तान बर्नार्डो सिल्भा, रुबेन डियास र माथेउस नुनेस छन्।
नेदरल्याण्ड्सका नाथन आके, क्रोएसियाका कोभासिच र ग्वार्डियोल, नर्वेका अर्लिङ हालान्ड, स्पेनका रोड्री, र बेल्जियमका जेरेमी डोकु जस्ता सामेल छन्।
यसअघि सन् २०२२ को कतार विश्वकपमा बार्सिलोनाका १७ खेलाडीले खेलेर कीर्तिमान राखेका थिए। तर, यसपटक विश्वकपमा टोलीको संख्या ३२ बाट बढाएर ४८ पुर्याइएकाले म्यानचेस्टर सिटीले १९ खेलाडीसहित त्यो रेकर्ड तोडेको हो।
१. म्यानचेस्टर सिटी: १९ खेलाडी
२. बायर्न म्युनिख: १८ खेलाडी
३. आर्सनल: १६ खेलाडी
४. पेरिस सेन्ट-जर्मेन (पिएसजी): १६ खेलाडी
५. बार्सिलोना: १५ खेलाडी
विश्वका १८ वटा यस्ता क्लबहरू छन्, जसका १० वा सोभन्दा बढी खेलाडीहरू यस विश्वकपमा सहभागी हुँदैछन्। यस सूचीमा साउदी अरबको क्लब अल-हिलाल (१२ खेलाडी) र इङ्ल्यान्डको तल्लो डिभिजनको क्लब सन्डरल्याण्ड (१० खेलाडी) पनि अटाएका छन्। स्पेनिस जायन्ट रियल मड्रिडका भने यसपटक १० जना खेलाडी मात्र विश्वकपमा देखिनेछन्।
यो गणनामा ती खेलाडीहरूलाई मात्र समावेश गरिएको छ, जसले सिजनको अन्तिम खेल सम्बन्धित क्लबबाटै खेलेका थिए (लोनमा गएका खेलाडीहरू गणना गरिएको छैन)।
