सम्राट बस्नेतले निर्देशन गर्न लागेको फिल्म 'कंगारू' मा कलाकार केदार घिमिरे 'माग्ने बुढा' अनुबन्धित भएका छन्।
सोमबार निर्माण टिम र घिमिरेबीच औपचारिक रूपमा सम्झौता भएको हो। निर्देशक सम्राटले केही समयअघि 'कंगारू' घोषणा गरेका थिए। यसअघि उनले फिल्म 'लाखे' निर्देशन गरेका थिए।
राजिव गुरुङ 'दीपक मनांगे' को प्रस्तुतिमा तयार हुन लागेको फिल्म सस्पेन्स, थ्रिलर र कमेडी जनरामा निर्माण गर्न लागिएको हो।
प्रेम थापा, भन बहादुर गुरुङ र लक्ष्मी राई निर्माता रहेको फिल्ममा रोनिश बहादुर बस्नेत र निशान श्रेष्ठ सह-निर्माता छन्।
फुलमुन मोसन पिक्चर्स र उत्तरगया म्युजिक एन्ड फिल्मसँग आस्याप इन्टरटेन्मेन्टको सहकार्यमा फिल्म निर्माण हुन लागेको हो।
सीमा गुरुङको कथा रहेको फिल्ममा महेश दवाडीको पटकथा छ। फिल्म निर्माणमा लक्ष्मी ज्वेलर्सले पनि सहकार्य गरेको छ। फिल्मका प्रोडक्सन डिजाइनर दिलीप पन्त छन्।
