प्रेम, विश्वासघात र प्रतिसोधको कथामा वेब सिरिज ‘साहु बा’ निर्माण भएको छ। छिट्टै प्रसारणमा आउने तयारीमा रहेको सिरिजको सोमबार काठमाडौंमा एक कार्यक्रमकाबीच टिजर सार्वजनिक गरिएको छ।
सिरिजमा प्रियंका कार्की, कविता नेपाली, विजु पार्की, नम्रता श्रेष्ठ, छुल्ठिम गुरूङ, सरिता गिरी, अमितेश शाह, अमित गिरी, सुजय योङ, रमेश अधिकारी, प्रदीप बास्तोला लगायतका कलाकारहरूले अभिनय गरेका छन्।
फ्रेम इन मोसन र म्युजिक नेपालको प्रस्तुतिमा निर्माण भएको सिरिजलाई सुजय योङले लेखन तथा निर्देशन गरेका हुन्। निर्माण टिमले यो सिरिजलाई एक्सन तथा क्राइम थ्रिलर जनरामा निर्माण गरिएको बताएको छ।
२४ एपिसोड निर्माण गरिएको सिरिजमा ३ सय ५० बढी कलाकारले काम गरेको निर्माण टिमले जानकारी दिएको छ। सिरिजको एक एपिसोड १ घण्टा लामो रहेको बताइएको छ।
नेपालमा ठूलो बजेटमा पूर्ण रूपमा पहिलो पटक वेब सिरिज निर्माण गरिएको समेत निर्माण कम्पनीले जानकारी दिएको छ।
अभिनेत्री कार्कीले सिरिजको लागि आफूले तीन वर्षभन्दा बढी समय दिएको बताएकी छन्।
सिरिजलाई अभिनेता आयुष्मान देशराज जोशीले संगम राई र अनिश तामाङसँग मिलेर खिचेका हुन्।
सिरिजमा प्रेम लामा र राजु तामाङको एक्सन, कुनाल कुँवरको कलर, सागर आले, मिस्टर डी र उजन शाक्यको गायन, श्रीजना पौडेलको मेकअप र राम प्रसाद चौधरी र चन्दन दत्तको सम्पादन रहेको छ।
एपी वान टेलिभिजन र म्युजिक नेपालद्वारा सञ्चालित ओटिटी प्लाटफर्म ‘मोःमो म्युजिक एण्ड मुभिज’ एपमा वेब सिरिज रिलिज हुनेछ।
