प्रदर्शन तयारीमा रहेको फिल्म 'पाँच पाण्डव'को दोस्रो ट्रेलर सार्वजनिक भएको छ। निर्माण टिमले मंगलबार काठमाडौंमा एक कार्यक्रम आयोजना गर्दै फिल्मको ट्रेलर-२ सार्वजनिक गरेको हो।
ट्रेलरको सुरूआत हरिवंश आचार्यको पात्रको संवादबाट हुन्छ। उनी भन्छन्, 'मेरा भ्राताहरू समस्यै समस्यामा झेलिएका रहेछन्। जहाँ आफ्नो परिवारै छैन, त्यो स्वर्ग के स्वर्ग हुन्छ र! म पृथ्वीलोक नै फर्कन चाहन्छु, इन्द्रदेव।'
पृथ्वीलोकमा रहेका आफ्ना भाइहरू दुःख र समस्यामा परेको थाहा पाएपछि हरिवंशको युधिष्ठिर पात्र उनीहरूलाई सहयोग गर्न पृथ्वी फर्किएको देखिन्छ। ट्रेलरको अधिकांश समय उनकै पात्र वरपर केन्द्रित छ।
पृथ्वीमा आएपछि उनले समस्यामा परेका व्यक्तिहरूलाई आफ्ना भाइ भीम, अर्जुन, नकुल र सहदेवका रूपमा सम्बोधन गर्दै सहयोग गर्न थाल्छन्। अन्याय, हिंसा, अत्याचार र सामाजिक विकृतिविरूद्ध उभिएका हरिवंशको पात्रले समस्यामा परेकाहरूको उद्धार गर्ने प्रयास गरेको देखिन्छ।
चार भाइसँग मिलेर युधिष्ठिरले कलियुगमा अन्याय, अत्याचार र सामाजिक विकृतिविरूद्ध महाभारत सुरू गर्ने कथा फिल्मले प्रस्तुत गर्ने संकेत ट्रेलरले गरेको छ।
महाभारतका पाँच पाण्डवको विम्बलाई समकालीन नेपाली समाजसँग जोड्दै प्रस्तुत गरिएको फिल्मको ट्रेलर समग्रमा हास्यप्रधान देखिन्छ। सामाजिक बेथितिमाथि व्यंग्य गर्दै मनोरञ्जन दिने शैलीमा फिल्म निर्माण गरिएको ट्रेलरबाट अनुमान गर्न सकिन्छ।
बसन्त निरौला निर्देशित 'पाँच पाण्डव' कात्तिक २० गते शुक्रबारदेखि प्रदर्शनमा आउनेछ। फिल्ममा हरिवंश आचार्य, महेश त्रिपाठी, जितु नेपाल, आर्यन सिग्देल, सुशील सिटौला, इभा गिरी, दीपाश्री निरौला, विनोद न्यौपानेलगायत कलाकार मुख्य भूमिकामा छन्।
काली रानी फिल्मस्को ब्यानरमा निर्माण भएको फिल्ममा सरिता गिरी, रमा थपलिया, प्रशान्त ताम्राकार, सीता न्यौपाने, रितेश पौडेल (रितेशजंग खत्री) लगायतको पनि अभिनय छ।
फिल्मका प्रस्तुतकर्ता नवीन श्रेष्ठ हुन्। निर्मातामा काली रानी श्रेष्ठ रहेकी छन्। 'पाँच पाण्डव'को कथा, पटकथा तथा संवाद सुशील पौडेलले लेखेका हुन्। लेखक पौडेलका अनुसार यो फिल्म सोसल ड्रामा विधामा आधारित छ। महाभारतका पाँच पाण्डवका चरित्र र विम्बलाई प्रयोग गर्दै फिल्मले समकालीन नेपाली समाजको कथा प्रस्तुत गर्नेछ।
फिल्मलाई श्याम तामाङले छायांकन गरेका छन् भने सुप्रिम पराजुलीले सम्पादन गरेका हुन्। द्वन्द्व निर्देशन सम्राट बस्नेतको छ। फिल्मको डिजिटल पार्टनर ओएसआर डिजिटल रहेको छ भने आरआर फिल्म्सले देशव्यापी वितरण गर्नेछ।
फिल्मले पायो युनिभर्सल सर्टिफिकेट
यसैबीच 'पाँच पाण्डव'ले चलचित्र जाँच समितिबाट युनिभर्सल सर्टिफिकेट पाएको छ। युनिभर्सल सर्टिफिकेट प्राप्त गरेसँगै यो फिल्म सबै उमेर समूहका दर्शकले हेर्न पाउनेछन्।
