'आर्टमान्डू नेपाल' को प्रस्तुतिमा बनेको फिल्म 'ऊनको स्वीटर' ले सफल प्रदर्शनको ५१ दिने उत्सव मनाएको छ।
देशभरका करिब ४० वटा फिल्म हलहरूमा ५१ औं दिन प्रदर्शन पूरा गरेको उपलक्ष्यमा निर्माण टिमले शनिबार साँझ काठमाडौंमा एक कार्यक्रमकाबीच खुसी साटेको हो।
आयोजित कार्यक्रममा फिल्म युनिट, सिनेमा हलहरू र स्वदेशी तथा ओभरसिज वितरकहरूलाई निर्माता संस्था आर्टमाण्डुका निर्देशक एवं 'ऊनको स्वीटर' का निर्देशक नवीन चौहान, निर्माणमा सहकार्य गरेको केन्द्र मोशन पिक्चर्सका सञ्चालक केन्द्र लिम्बु, कार्यकारी निर्माताहरू मिलन खत्री र सागर बुढाथोकी लगायतले प्रशंसा पत्र प्रदान गरे। यस अवसरमा विभिन्न पोस्टरहरूद्वारा सजाइएको तीन तले केक काटेर उत्सव मनाइएको थियो।
निर्देशक चौहान तथा कलाकारहरू विपिन कार्की र मिरूना मगरले सबै दर्शक, शुभचिन्तक तथा समर्थकहरूलाई धन्यवाद व्यक्त गरे। निर्देशक चौहानले फिल्मले पाएको मायाले आगामी दिनमा अझ राम्रो काम गर्न प्रेरित गरेको भन्दै खुसी व्यक्त गरे।
नेपाली फिल्म क्षेत्रमा ५१ दिन प्रदर्शन हुनुलाई ठूलो सफलता मानिन्छ। वैशाख २६ गतेदेखि प्रदर्शनमा आएको 'ऊनको स्वीटर' ले दर्शकहरूको मन जित्दै बक्स अफिसमा राम्रो प्रदर्शन गरिरहेको छ। हालसम्म यस फिल्मले ११ करोडभन्दा बढी व्यापार गरिसकेको निर्माणपक्षले जनाएको छ।
यो फिल्ममा विपिन र मिरुनासहित एलेक्स पारस, परीक्षा लिम्बु, विल्सन विक्रम राई, भावना खपांगी मगर, सुनिल पोखरेललगायत कलाकारहरूको अभिनय छ। यसका गीत निर्देशक सुजन चापागाईँ हुन् भने संगीत निर्देशक कोविद बज्र हुन्।
फिल्मका सबै गीतहरू स्रोता तथा दर्शकमाझ चर्चित छन्।
