अभिनेता अनमोल केसीको शीर्ष अभिनय रहेको फिल्म 'जेरी अन टप' शुक्रबारदेखि देशव्यापी प्रदर्शनमा आएको छ। एड्भेन्चर लभस्टोरी यो फिल्मले २ सयभन्दा बढी शोसहित प्रदर्शन थालेको हो।
यो फिल्मले रिलिजअघि टिजर र ट्रेलरबाट राम्रो हाइप बनाएको थियो। फिल्मको बिहानैदेखिका शोमा दर्शक अकुपेन्सी पनि सुखद् देखिन्छ। जसले बक्स अफिसमा फिल्मले सुखद् ओपनिङ गर्ने संकेत गरेको छ।
बिहानी शो बाटै फिल्मले दर्शकको साथ पाएपछि अभिनेता अनमोल केसीसहित अभिनेत्रीहरू आँचल शर्मा र जसिता गुरूङ हलमा पुगेका छन्। बिहान कमलपोखरी सिटी सेन्टरस्थित बिग मुभिजमा पुगेर उनीहरूले फिल्मको पहिलो शोका दर्शकसँग प्रतिक्रिया लिए। त्यस क्रममा दर्शकले कलाकारहरूसँग तस्बिर खिचाए। फिल्म राम्रो बनेको प्रतिक्रिया दिए।
फिल्मको गुणस्तर र त्यसमा पनि खासगरी भीएफएक्सको दर्शकले तारिफ गरेका छन्। कलाकारको अभिनयलाई पनि रूचाएका छन्।
रनटाइम झन्डै ३ घण्टा
'जेरी अन टप' अन्य नेपाली फिल्मभन्दा तुलनात्मक रूपमा लामो छ। यसको रनटाइम झन्डै ३ घण्टा (२ घण्टा ५४ मिनेट) तोकिएको छ। यो अवधि सामान्यतया नेपाली फिल्मको औसत लम्बाइभन्दा बढी हो। यो अनमोलको फिल्म करिअरकै सबभन्दा लामो फिल्म हो। फिल्म लामो हुँदा पनि यसले राम्रो शो पाएको हो।
सुयोग गुरूङको निर्देशनमा बनेको 'जेरी अन टप' ले केन्द्रीय चलचित्र जाँच समिति (सेन्सर बोर्ड) बाट युनिभर्सल सर्टिफिकेट पाएको छ। फिल्म हरेक उमेर समूहका दर्शकले हेर्न पाउनेछन्।
फिल्ममा भुवन केसी, केदार घिमिरे, उषा खड्गीलगायत कलाकारहरूको समेत शीर्ष अभिनय छ। सगरमाथा आरोहण र त्यसक्रमको प्रेमकथामा फिल्म बनेको हो।
सरोज न्यौपानेको प्रस्तुति रहेको फिल्मको निर्माणमा न्यौपानेसँग भविष्य खड्का, रोबिन शेरचन, दीपक भण्डारी लगायतले लगानीमा सहकार्य गरेका छन्।
1635339834.jpeg)
-1746009348.jpg)
