सौगात मल्ल र सृष्टि श्रेष्ठ अभिनीत फिल्म 'भाइरल गोर्खे' को प्रदर्शन मिति घोषणा गरिएको छ।
सोमबार फिल्मको नयाँ पोस्टर सार्वजनिक गर्दै रिलिज मिति घोषणा गरिएको हो। यो फिल्म माघ १ गते रिलिज हुनेछ।
पोस्टरमा फिल्मका मुख्य दुई कलाकार सौगात र सृष्टि फिचर्ड छन्। उनीहरूलाई रोमान्टिक भावमा देखाइएको छ। छेउमा ‘बतासले उडाई लग्यो माया मेरो’ लेखिएको छ। यसले दुई पात्रबीचको प्रेम दर्शाउँछ। ‘बतासले उडाई लग्यो माया मेरो’ बोलको गीत सोमबार सार्वजनिक हुँदैछ।
पोस्टरमा लाइक, लभ रियाक्ट र इमोजी छ, जसले सामाजिक सञ्जालमा भाइरल हुने रहर र यसमा समर्पित हुने मोहलाई दर्शाउँछ। फलोइङ फर यू लेखिएको छ र मोबाइलको फ्रेमभित्र रहेका सौगात र सृष्टि टिकटक वा रिल्स बनाइरहेको जस्तो देखिन्छ।
निर्माण पक्षका अनुसार, 'भाइरल गोर्खे' टिकटक, फेसबुक र युट्युबमा जसरी हुन्छ भाइरल हुने पछिल्लो ट्रेन्डलाई मुख्य कथा बनाएर बनेको फिल्म हो।
रोगकै रूपमा विकास भइरहेको यो ट्रेन्डलाई समाएर बनेको समसामयिक फिल्म भएकाले दर्शकको मन जित्ने निर्माण टिमको विश्वास छ।
समसामयिक र घरघरको विषय भएकाले दर्शकले मन पराउनेमा आफू ढुक्क रहेको निर्देशक निगम श्रेष्ठले बताएका छन्। कमेडी र ह्युमर पनि रहेकाले दर्शकका लागि फिल्म पूर्ण प्याकेज भएको उनले बताए।
'भाइरल गोर्खे' मा सौगात मल्ल र सृष्टि श्रेष्ठ मुख्य भूमिकामा छन्। एके ब्रदर कम्पनी, द जिएमआई एकेडेमी र निर्भाना फिल्म स्कुलको व्यानरमा निर्माण भएको फिल्ममा बुद्धि तामाङ, लक्ष्मी गिरी, राजाराम पौडेल, ऋषि धमला, रविन भुजेल र मिस पविको समेत अभिनय छ। अमित श्रेष्ठ, विशाल ताम्राकार, महेश लामिछाने र केवल जंग कुँवर निर्माता हुन् भने सह–निर्मातामा शुभेक्षा पौडेल, भुवन अधिकारी र निखिल पौडेल छन्।
अमर महर्जनको सिनेमाटोग्राफी रहेको फिल्म लमजुङको भुजुङ गाउँ, गोरखा र चितवनमा खिचिएको हो।
1635339834.jpeg)
-1746009348.jpg)
