नेपाली फिल्म 'रमिताको पिरति' को आधिकारिक टिजर सार्वजनिक गरिएको छ। बुढासुब्बा डिजिटलको युट्युब च्यानलमार्फत फिल्मको टिजर सार्वजनिक भएको हो।
सार्वजनिक टिजरमा अभिनेत्री आना शर्मा, अभिनेताहरू धिरज मगर, समिर श्रेष्ठ र विनय श्रेष्ठलाई मुख्य रूपमा प्रस्तुत गरिएको छ। टिजरमा अभिनेत्री आना केन्द्रमा छिन्। उनलाई प्रेम, रोमाञ्च, खुसी, दुःखदेखि हृदयवेदनासम्मका विभिन्न भावनात्मक अवस्थाहरूमा प्रस्तुत गरिएको छ। टिजर हेर्दा फिल्मले एक युवतीको गहिरो मनोविज्ञान र संघर्षको कथा बोकेको संकेत गर्छ।
लोकप्रिय गायक समिर श्रेष्ठले यसै फिल्ममार्फत अभिनय यात्रा आरम्भ गर्दै मुख्य भूमिकामा डेब्यु गरेका छन्। अभिनेता धिरज पनि फरक अवतारमा देखिएका छन्।
फिल्ममा जियाना, गौमाया गुरूङ, पशुपति राई, रेणु योगी, थिन्ले ल्हामो लगायतको समेत अभिनय छ।
सेरो फिल्मस्को प्रस्तुतिमा तयार भएको यो फिल्मले विशेष रूपमा महिला पात्रको कथा उठान गरेको छ। रोचक कुरा के छ भने, फिल्मको लेखन तथा निर्देशन सुदीप्ताले गरेकी छन्। एक महिला पात्रको कथालाई महिला निर्देशककै दृष्टिकोणबाट पर्दामा उतारिएको छ।
सागर लम्साल निर्माता रहेको यो फिल्म आगामी भ्यालेन्टाइन अर्थात् माघ २३ गतेदेखि प्रदर्शनमा आउने तयारीमा छ। चलचित्रलाई एप्पल इन्टरटेन्मेन्ट, रिच इन्टरटेन्मेन्ट र एफडी कम्पनीले वितरण गर्नेछन्।
-1746009348.jpg)
