टेलिभिजन सिरियलका चर्चित कलाकार मरिचमान श्रेष्ठ (बल्छी धुर्बे) को निर्देशनमा बनेको फिल्म 'गोबर गणेश' को पोस्टर सार्वजनिक गरिएको छ। मंगलबार सार्वजनिक पोस्टरमा फिल्मका दुई मुख्य कलाकार प्रस्तुत छन्।
पोस्टरमा मरिचमान र अभिनेत्री वर्षा शिवाकोटी छन्। वर्षाले रिक्सा चलाइरहेकी छन् भने सोही रिक्सामा बल्छी सवार छन्। दुवैको मुद्रा हँसिलो देखिन्छ।
उनीहरूको पहिरन र बल्छीको घाँटीमा झुन्डिएको सिठ्ठीले उनीहरू नगरपालिकाको फोहोर संकलन गर्ने कर्मचारीको भूमिकामा रहेको अनुमान गर्न सकिन्छ। पृष्ठभूमिमा देखिएको बाक्लो बस्तीले कीर्तिपुर आसपासको झझल्को दिन्छ।
पोस्टरले कथावस्तुबारे थोरै संकेत गरे पनि निर्माण पक्षले यसबारे विस्तृत जानकारी गराएको छैन।
पोस्ट प्रोडक्सनको चरणमा रहेको 'गोबर गणेश' माघ १ गतेदेखि प्रदर्शनमा आउनेछ। पोस्टर सार्वजनिक गर्दै मरिचमान श्रेष्ठले सानो पर्दामा जस्तै ठूलो पर्दामा पनि दर्शकबाट माया पाउने अपेक्षा व्यक्त गरे। दर्शकले रूचाउने विषय र प्रस्तुतिसहित आउन लागेकाले दर्शकको साथ पाउनेमा उनी विश्वस्त छन्।
'बल्छी धुर्बे फिल्मस्' को प्रस्तुति रहेको 'गोबर गणेश' मा मरिचमान र वर्षासँगै विनोद न्यौपाने, पदम तामाङ, निर्मल शर्मा, लक्ष्मीनाथ तिमल्सिना, सन्तोष बानिया, सन्दीप लामा, माओत्से गुरूङ, सीतादेवी तिमल्सिना, पुजन घिमिरे (पुकु), बुद्धि तामाङ, विशाल पहाडी, रमेश बुढाथोकी, स्वस्तिका लामिछाने लगायतको अभिनय छ।
शिवराम श्रेष्ठको छायांकन रहेको फिल्ममा विपीन मल्लको सम्पादन रहनेछ।
-1746009348.jpg)
