फिल्म 'ऊनको स्वीटर' ले भारतमा प्रदर्शनको ५१ औं दिन पूरा गरेको छ।
भारतभर ४० वटा हलमा रिलिज फिल्मले विभिन्न सहरका ६ वटा हलमा ५१ दिनसम्म निरन्तर प्रदर्शनमा रहेको निर्माणपक्षले जनाएको छ।
निर्माण पक्षका अनुसार चण्डिगढको पिभिआर सेन्ट्रल, लुधियानाको पिभिआर एभोन सिटी मल, सिलिगुडीका आईएनओएक्स सिटी सेन्टर र भेगा सर्कल मल, सिक्किमको आईएनओएक्स वेस्ट पोइन्ट मल तथा लखनउको पिभिआर सहरगन्ज मलमा फिल्म प्रदर्शनरत रहेको हो।
नवीन चौहान निर्देशित 'ऊनको स्वीटर' भारतमा नोभेम्बर २१ देखि प्रदर्शनमा आएको थियो। सिक्किमको राजधानी गान्तोकमा प्रिमियर शोबाट फिल्मको भारत यात्रा सुरू भएको थियो। त्यसपछि नाम्ची, दार्जिलिङ, कालिम्पोङ, कस्र्याङ र सिलिगुडी हुँदै पूर्वोत्तर भारतमा प्रदर्शन भयो।
आसामका गुवाहाटी, तेजपुर, विश्वनाथ चाराली, मार्गेरिटा तथा अरुणान्चल प्रदेशको ईटानगरसम्म फिल्म प्रदर्शन भयो। कोलकाताका हलहरूमा पनि फिल्मले आफ्नै दर्शक वर्ग बनाएको र दिल्लीमा नयाँ दर्शक पाएको निर्माण पक्षले जनाएको छ।
'ऊनको स्वीटर' महाराष्ट्रको मुम्बईदेखि दक्षिण भारतसम्म पुग्न सफल भएको निर्माणपक्षको दाबी छ।
केरला, बैंगलोर र हैदराबाद जस्ता सहरहरूमा भाषा फरक भए पनि भावनात्मक अनुभूति एउटै रहेको प्रतिक्रिया दर्शकबाट आएको निर्देशक नवीन चौहानले बताएका छन्।
पश्चिम र उत्तर भारततर्फ मुम्बई, पुणे, चण्डिगढ, लुधियाना, शिम्ला, देहरादून र लखनउसम्म पुगेको यो यात्राले नेपाली फिल्मको अन्तर्राष्ट्रिय बजार विस्तारको सम्भावना देखाएको निर्देशक चौहानको भनाइ छ। भारतमा फिल्मलाई एसली प्रोडक्सन र एवन राई समूहले रिलिज गरेका हुन्।
आर्टमान्डू नेपाल प्रा.लि.ले निर्माण गरेको 'ऊनको स्वीटर' ले नेपालमा ४० वटाभन्दा बढी हलमा ५१ दिन मनाउँदै करिब १२ करोड रूपैयाँ ग्रस कमाइ गरेको थियो।
यो फिल्ममा विपिन कार्की, मिरूना मगर, एलेक्स पारस, परीक्षा लिम्बु, सुनिल पोखरेललगायत कलाकारहरूको अभिनय छ।
-1746009348.jpg)
