नेपालमा नयाँ नेपाली ओटिटी प्लेटफर्म 'युएनए डिजिटल' शुभारम्भ भएको छ।
शनिबार काठमाडौंमा एक कार्यक्रमकाबीच संचार तथा सूचना प्रविधिमन्त्री जगदीश खरेल र चलचित्र विकास बोर्डका अध्यक्ष दिनेश डिसीले ओटिटी शुभारम्भ गरेका हुन्।
यस कम्पनीका सीइओ, फिल्म वितरक तथा निर्माता उज्वल गुरागाईं हुन्। उनका अनुसार दर्शकले फेब्रुअरी १ तारिख (१८ माघ) देखि यो ओटिटीमा फिल्म, शो र ओरजिनल सिरिज हेर्न पाउनेछन्। आगामी १ फेब्रुअरीदेखि प्रयोगकर्ताले एप्पलको आईओएस र गुगल प्ले स्टोरमा उपलब्ध एपसहित ब्राउजर र टिभी संस्करण प्रयोग गर्न पाउने सीइओ गुरागाईंले बताए।
यस ओटिटीमार्फत दर्शकले आशिष ढकालको सिरिज 'सम्बन्ध तिम्रो मेरो','क्राइम इन स्टोरी', अभिनेता सलोन बस्नेतको फिल्म 'रूम नम्बर ८' प्रदर्शनमा आउन लागेको जानकारी दिइएको छ।
सलोन बस्नेतले निर्माण गर्न लागेको यस फिल्मलाई निर्माण पक्षले ओटिटी प्लेटफर्मको पहिलो फिल्मका रूपमा रिलिज गर्न लागेको हो।
त्यस्तै, सीइयो गुरागाईंले नै निर्माण गर्न लागेको 'रियल रिदम' ओटिटीमा राखिने छ। यसै कम्पनीले निर्माण गरेको अर्को सिरिज 'चोइज','सिनेपट न्युज', आयुसा महर्जनको होस्टमा 'चेलीबेटी' साथै 'काठमाडौं नाइट' पनि यसबाट प्रसारण हुनेछ।
यसका लागि नेपाल र विदेशका लागि अलग–अलग ‘ओटीटी विन्डो’ सहित कन्टेन्ट क्रमशः ल्याउने तयारी निर्माण पक्षको छ। सीइयो गुरागाइँका अनुसार सुरूवात १४ फेब्रुअरीदेखि हुने छ भने सब्सक्राइब शुल्कबारेको जानकारी चाँडै दिइने भएको छ।
आयोजित समारोहमा संचारमन्त्री खरेलले ओटिटीको शुभारम्भले बदलिँदो प्राविधिक आयाम र दर्शकको रूचिलाई युएनए डिजिटल ओटिटीले पूरा गर्न सक्नुपर्ने बताए। उनले समयसँगै परिवर्तन हुँदै जानु राम्रो हुने तर्क गरे।
'यसलाई विश्वव्यापी बनाउनका लागि महत्वपूर्ण भूमिका निवार्ह गर्छ भन्ने मलाई लागेको छ,' उनले भने, 'हाम्रा अडियन्स, जनताहरूले संसारभर खोजेको कुरा कन्टेन छ। तपाईँले फिल्म बनाउनुहोस्, समाचार बनाउनुहोस्, टेलिभिजन प्रोग्राम बनाउनहोस्, अन्तर्वार्ता गर्नुहोस्, जे–जे बनाउनुहोस् त्यसमा महत्वपूर्ण भनेको कन्टेन नै हो।'
बोर्डका अध्यक्ष दिनेश डिसीले ओटिटी खुलेकोमा बधाई दिँदै राम्रो कामको सुरूवात भएको बताए।
'हामी क्रियटिभ मानिसहरू एउटा चरा जस्तै हौं,' उनले चराको उदाहरण दिँदै भने, 'आकाशमा एउटा चरासँग अर्को चरासँग ठोक्किँदा पनि आ–आफ्नै उडानहरू हुन्छन्। युएनको उडान यहाँबाट सुरू भएको छ र यो उडानलाई शुभकामना छ।'
कार्यक्रममा शुभकामना दिन पुगेको अभिनेता तथा निर्माता दीपकराज गिरीले फिल्मकर्मीका लागि यस्ता ओटिटी अति आवश्यक भएको र ओटिटीको सुरूआत गरेकोमा बधाई दिए।
उनले भने, 'यस्तो प्लेटफर्महरू भनेका हामी चलचित्रकर्मीहरूका लागि एकदम आवश्वक छ। विदेशमा एउटा प्रोड्युसरले सिनेमा हलबाट जति पैसा कमाउँछ। त्यो भन्दा बढी यस्ता प्लेटफर्मबाट आर्जन हुन्छ। त्यस कारण हाम्रो उद्योग अगाडि बढ्दै गरेको अवस्थामा यस्ता प्लेटफर्महरू आइदिनाले निर्माता तथा निर्देशकलाई लगानी गर्ने वातावरण अझै बढ्दै जान्छ।'
यो ओटिटीले सुरूवातमा कन्टेन्टमाथि ६ करोड रूपैयाँ लगानीसहित संचालनमा आउन लागेको जनाइएको छ। साथै ओटिटीमा नेपाली भाषाबाहेकका अर्थात भारतीय, बंगलादेशी र जापानी सामग्रीलाई पनि क्रमशः रिलिज गर्ने यस सीइओ गुरागाईंको भनाइ छ।
-1746009348.jpg)
