अभिनेत्री वर्षा राउतले हिन्दी फिल्ममा डेब्यु गर्ने भएकी छिन्। उनले हिन्दी फिल्म 'रिमझिम गिरे सावन' मा मुख्य मुख्य भूमिकाका लागि निर्माण पक्षसँग सम्झौता गरेकी हुन्।
हालै काठमाडौंमा दुई पक्षबीच सम्झौता भएको हो। नेपाली रजतपटमा आफ्नो बलियो उपस्थिति जनाएकी वर्षाका लागि यो विदेशी भाषाको फिल्ममा पहिलो मुख्य भूमिका हो। यो फिल्म उत्तरी सिक्किमको लाचुङको रमणीय तर दुर्गम पहाडी भूभागमा आधारित एक सामाजिक कथामा आधारित हुनेछ।
नेपाली समुदायको परिवेश समेटिएको यस फिल्मले मृत्युदण्डको सजाय पाएकी एक विवाहित महिला तथा एक सन्तानकी आमा 'रिमझिम क्षेत्री' को संघर्षपूर्ण कथालाई चित्रण गर्छ, जसमा रिमझिमको भूमिकामा वर्षाले अभिनय गर्नेछिन्। ‘रिमझिम गिरे सावन’ले प्रणालीगत भ्रष्टाचार, न्याय र मर्यादाका लागि एक महिलाले गर्ने भावनात्मक र साहसी संघर्षलाई पर्दामा उतार्ने निर्देशक अर्नब पलले बताए।
फिल्मलाई बंगाली फिल्म उद्योगका बहु आयामिक निर्देशक अर्नब पलले निर्देशन गर्दैछन्। यसअघि 'तान्त्रिक' जस्तो क्राइम थ्रिलर र ‘मेघमल्लार’ जस्ता भावनात्मक कथा बोकेको फिल्म निर्देशन गरिसकेका पलले 'वृष्टि तोमाके दिलाम' बाट नेपाल अन्तर्राष्ट्रिय चलचित्र महोत्सवमा उत्कृष्ट निर्देशकको अवार्ड समेत हात पारिसकेका छन्। साथै उनले सान्टियागो इन्टरनेशनल ग्लोबल फिल्म अवार्डस् लगायतका प्रतिष्ठित महोत्सवहरूमा उत्कृष्ट निर्देशकको अवार्ड जितेर अन्तर्राष्ट्रिय प्रशंसा कमाइसकेका छन्।
फिल्ममा बलिउड कलाकारहरू सुब्रत दत्त, राजेश शर्मा, आशिष् विद्यार्थी र यशपाल शर्माको मुख्य भूमिका रहने पक्का भइसकेको निर्माण पक्षले जनाएको छ।
रिमझिमकी दिदी 'रून्झुन' को भूमिकामा कोलकाताकी कलाकार सुस्मिता बसुमता देखिनेछिन् भने 'सावन' को भूमिकाका लागि एक चर्चित बलिउड अभिनेताको खोजी भइरहेको निर्माण पक्षले जनाएको छ।
आफ्नो नयाँ यात्राप्रति उत्साह व्यक्त गर्दै वर्षाले भनिन्, 'मैले खोजिरहेको र मेरो अभिनय क्षमतालाई चुनौती दिने खालको भूमिका पाएकी छु। हिउँले भरिएको कठिन भूगोलमा छायांकन गर्नु चुनौतीपूर्ण भए पनि यो मेरा लागि सिक्ने र बढ्ने अवसर हो। भारतमा ख्याति कमाएको टिमको फिल्म र बलिउड कलाकारहरूसँग काम गर्न पाउनु मेरो लागि गर्वको कुरा हो।'
निर्देशक अर्नब पलका अनुसार वर्षाको छनोट उत्कृष्ट अभिनय क्षमताका कारण गरिएको हो। नेपाली कलाकार नै छनोट गर्नुपर्ने अवस्था हिन्दी बोल्ने तर नेपाली लवजमा हुनुपर्ने भएको कारण रहेको उनले बताए।
फिल्मको पटकथा लेखक राकेश कुमार त्रिपाठीले तयार पारेका हुन्। सन् २००२ देखि लेखन र गीतकारका रूपमा सक्रिय त्रिपाठीका ७०० भन्दा बढी गीत र १५ वटा टेलिभिजन शृङ्खलाहरू छन्। उनको अर्को फिल्म 'तुम रहे ना तुम' सन् २०२६ मा रिलिज हुँदैछ।
प्राविधिक विभागमा भारतीय राष्ट्रिय पुरस्कार विजेताहरू सामेल छन्, जसमा डिओपी असिम बोस, सम्पादक अघ्र्य कमल मित्र र कला निर्देशक अतनु साहा रहेका छन्। विभिन्न फिल्म उद्योगमा १२ वर्षको अनुभव बटुलेकी नाङ एनी गोगोईले लाइन प्रोड्युसर र कस्ट्युम डिजाइनरको जिम्मेवारी सम्हालेकी छिन्।
यसका साथै, नेपालका तर्फबाट रामगोपाल तिमल्सिना र नृपेश रूपाखेती प्रोडक्सन म्यानेजरको रूपमा छन्।
-1746009348.jpg)
