चरित्र अभिनेता माओत्से गुरूङ निर्देशित फिल्म ‘पेन्सन पट्टा’ को सम्पूर्ण छायांकन सकिएको छ। कस्कीस्थित एक रिसोर्टमा ३३ दिनमा फिल्मको इन्डक्ल्याप गरिएको हो।
छायांकन सकिएको जानकारी दिँदै निर्देशक गुरूङले अब केही दिनमा पोष्ट-प्रोडक्सनको काम सुरू बताए।
उनले भने, 'त्यसमा कति समय लाग्छ भन्ने आधारमा फिल्मको रिलिज मिति घोषणा गनेछौं। हामी दर्शकलाई एक सुन्दर फिल्म देखाउन चाहन्छौं। त्यसैले कुनैपनि किसिमको सम्झौता नगरी काम गर्नेछौं।'
अहिलेसम्म फिल्मको रिलिज मिति घोषणा गरिएको छैन।
माओत्से गुरूङ फिल्मस्को ब्यानरमा निर्माण भएको फिल्ममा निर्देशक गुरूङको पनि लगानी छ।
फिल्ममा दयाहाङ राई, सुनिल थापा, पशुपति राई, गौमाया गुरूङ, बुद्धि तामाङ, विल्सन विक्रम राई, राज थापा काउछा, लुनिभा तुलाधर, विश्वास गुरूङ, माया गुरूङ, यासिली राईलगायत कालाकारअरूको अभिनय छ।
फिल्मको शीर्षकले भूतपूर्व लाहुरेको कथा जस्तो लागे पनि कथा भने एक लोभी युवक कसरी दानी बन्छ भन्ने विषयमा केन्द्रित रहेको निर्देशक तथा निर्माता गुरूङले बताए। फिल्मको कथा पनि निर्देशक गुरूङले नै लेखेका हुन्।
मीन कोन्मे गुरूङ, भोज बहादुर गुरूङ र सपना गुरूङको लगानी रहने फिल्मको प्रोडक्सन म्यानेजर डिबी गुरूङ हुन्। फिल्मको छायांकन सुशन प्रजापतिले गरेका हुन् भने कास्टिङ डिरेक्टर सुरज तमु र संगीत झुमा लिम्बु, मनोज थापा मगर र शिव बराइलीले तयार पारिरहेका छन्।
निर्देशक माओत्से गुरूङको डेव्यु निर्देशनमा निर्माण भएको फिल्म 'दयारानी' बक्सअफिसमा हिट भएको थियो। चरित्र अभिनेतामा रोजाइका कलाकारसमेत रहेका उनी पछिल्लो समय लेखन तथा निर्देशनमा पनि सक्रिय हुन थालेका छन्। उनले यसअघि गुरूङ भाषाका थुप्रै फिल्म निर्देशन गरेका छन्।
-1746009348.jpg)
