एक्सनप्रधान नेपाली फिल्म 'परिवर्तन' शुक्रबारदेखि देशभर प्रदर्शनमा आएको छ।
फ्राइडे रिलिजको अवसर पारेर प्रदर्शनमा आएको फिल्मको शीर्ष भूमिकामा अभिनेता सुशील श्रेष्ठ छन्।
यो फिल्मले अन्याय, संघर्ष र प्रतिशोधको कथालाई केन्द्रमा राख्दै समाजमा देखिने विकृति र त्यसविरूद्ध उठ्ने पात्रहरूको लडाइँलाई प्रस्तुत गर्छ। यसमा सुशीलले अन्यायविरूद्ध दृढतापूर्वक उभिने पात्रको भूमिका निर्वाह गरेका छन्।
फिल्ममा सुशीलसहित अञ्जना बराइली, करिश्मा मानन्धर, बुद्धि तामाङ, हेमन्त बुढाथोकी, सुवास मेचे, पुकार भट्टराई, सरोज खनाललगायत कलाकारहरूको अभिनय छ।
विजय केरूङको निर्देशनमा बनेको फिल्मको कथा तथा निर्मातामा दीपक शिवाकोटी छन्। यो फिल्मको रनटाइम २ घण्टा १३ मिनेट छ।
आजदेखि बलिउडको वार-ड्रामा फिल्म 'बोर्डर' को सिक्वेल 'बोर्डर २' पनि रिलिज भएको छ। अनुराग सिंह निर्देशित फिल्ममा सनी देओल, वरूण धवन, दिलजीत दोसाँझ, अहान सेट्टीलगायत कलाकारहरूको अभिनय छ। सीमा क्षेत्रमा हुने तनाव, सैनिकहरूको व्यक्तिगत संघर्ष र देशका लागि ज्यान अर्पण गर्न तयार भावनालाई फिल्मले कथाको केन्द्रमा राखेको छ।
सन् १९९७ मा रिलिज 'बोर्डर' सुपरहिट फिल्म हो। त्यसको झन्डै २८ वर्षपछि सिक्वेल दर्शकमाझ आएको हो। यसको रनटाइम ३ घण्टा २० मिनेट छ।
शुक्रबारदेखि नेपाली हलमा हलिउड फिल्म 'मेरसी' पनि रिलिज भएको छ। क्रिस प्र्याट र बेरेक्का फग्र्युसन अभिनीत यो विज्ञानकथामा आधारित फिल्म हो। यसलाई एक्सन–क्राइम जनरामा राखिएको छ।
तैमुर बेकमाम्बेटोभ निर्देशित फिल्ममा अत्याधुनिक कृत्रिम बौद्धिक प्रणाली र मानव न्याय व्यवस्थाबीचको द्वन्द्वलाई मुख्य विषय बनाइएको छ। यो फिल्मको रनटाइम १ घण्टा ३६ मिनेट तय छ।
-1746009348.jpg)
