टेलिभिजन सिरियलका चर्चित कलाकार मरिचमान श्रेष्ठ (बल्छी धुर्वे) को लेखन तथा निर्देशनमा रहेको फिल्म 'गोबर गणेश' ले बक्स अफिसमा उत्साहजनक व्यापार गरिरहेको निर्माण पक्षले दाबी गरेको छ।
माघ १ गते (माघे संक्रान्ति) देखि प्रदर्शनमा आएको फिल्मले १ करोड १० लाख रूपैयाँभन्दा बढीको ग्रस कलेक्सन गरेको निर्माताको दाबी छ। निर्देशक, निर्माता तथा कलाकार मरिचमानले शनिबार एक पोस्टर सार्वजनिक गर्दै ९ दिन (शुक्रबार) सम्ममा उक्त कमाइ भएको जानकारी दिएका हुन्। यद्यपि, चलचित्र विकास बोर्डले भने यसको आधिकारिक बक्स अफिस विवरण सोमबार सार्वजनिक गर्नेछ।
दोस्रो सातामा पनि फिल्मले हलमा दर्शकहरूको उत्साहजनक साथ पाइरहेको निर्माण टिमको भनाइ छ। वर्ड अफ माउथ राम्रो रहेकाले फिल्म हेर्ने दर्शकहरूको संख्या बढिरहेको बताइएको छ। फिल्मका कलाकारहरू पनि विभिन्न हलमा पुगेर दर्शकहरूसँग प्रत्यक्ष प्रतिक्रिया लिइरहेका छन्।
फिल्म हेरेर निस्किएका दर्शकहरूले यसलाई ‘आफ्नै घरको कथा’ भन्दै प्रशंसा गरेको निर्माण टिमको भनाइ छ। निर्देशक तथा मुख्य कलाकार मरिचमान श्रेष्ठले दर्शकहरूको प्रतिक्रियालाई नै आफूहरूका लागि सबैभन्दा ठूलो उपलब्धि भएको बताएका छन्।
'हामीले एउटा इमानदार कथा भन्ने प्रयास गरेका थियौं। दर्शकहरूले हलबाट निस्कँदा 'यो मेरो आफ्नै कथा हो' भन्नुभएको सुन्दा निकै सन्तुष्टि मिल्छ', हल भिजिटका क्रममा मरिचमानले भने।
बल्छी धुर्वे फिल्मसको प्रस्तुति रहेको 'गोबर गणेश' मा मरिचमान श्रेष्ठसँगै वर्षा शिवाकोटी, बुद्धि तामाङ, पदम तामाङ, विनोद न्यौपाने, निर्मल शर्मा, माओत्से गुरूङ, सीतादेवी तिमल्सिना, पुजन घिमिरे (पुकु), सन्तोष बानियाँलगायत कलाकारहरूको अभिनय छ।
-1746009348.jpg)
