अनिल बुढा मगर निर्देशित फिल्म 'मितज्यू' को छायांकन सकिएको छ।
यो फिल्मको छायांकन एक महिनामै सकिएको हो। निर्माता जनक घर्ती मगरका अनुसार कलाकार र प्राविधिक टोलीको समन्वयका कारण निर्धारित समयमै छायांकन सम्पन्न भएको हो।
'मितज्यू' सामाजिक कथावस्तुमा आधारित फिल्म हो। दाङ र रोल्पाका विभिन्न स्थानमा छायांकन भएको फिल्ममा दयाहाङ राई, सौगात मल्ल, तेरिया फौजा मगर, पुस्कर गुरूङ, शिशिर वाङ्देल, राज थापा, सुवर्ण थापा, अनु थापा, स्मिता लामिछाने, अरूण पुन मगर, उत्तम राज पाण्डे, सविन कट्टेल, उमेश सोनाम, पवित्रा खड्का, चाहाना राना मगर, अनुशा राई, खड्गबहादुर पुन मगर (खबपु) लगायत कलाकारहरूको अभिनय छ।
तेरिया मगरले यसै फिल्मबाट अभिनेत्रीका रूपमा डेब्यु गरेकी हुन्।
निर्देशक अनिल बुढा मगरले छायांकन रमाइलो वातारणमा सम्पन्न भएको बताउँदै सबै पक्षको सहयोगका कारण छोटो समयमै काम सक्न सम्भव भएको उल्लेख गरे। यो उनको दोस्रो निर्देशकीय फिल्म हो। यसअघि उनले निर्देशन गरेको 'घरज्वाइँ' सफल भएको थियो।
फिल्मको पोडक्सन म्यानेजर धन बहादुर राई (भान्जा) हुन् भने मुख्य सहायक निर्देशक फिरोज खड्का रहेका छन्। सहायक निर्देशकमा अनिल दाहाल, सञ्जु नेपाली र एल्मिना राई छन्। प्रोडक्सन डिजाइनर किशोर नेपाल, ड्रेस डिजाइनर संगीता रोका मगर, प्रतीक्षा भाट क्षेत्री, सम्पादक लोकश बज्राचार्य रहेको फिल्मको छायाँकार शिशिर बिशंखे हुन्।
फिल्ममा द्वन्द्व निर्देशन प्रभात विष्टले गरेका छन् भने साउन्ड डिजाइनर नवीन श्रेष्ठ हुन्। संगीत श्रीकृष्ण बम मल्लको रहनेछ। फिल्मका गीतमा संगीतकार मल्ल, मेलिन राई र लक्ष्मी मल्लले स्वर दिएका छन्।
आरआर फिल्म्स वितरक रहेको 'मितज्यू' आगामी जेठ १५ गते गणतन्त्र दिवसको अवसरमा प्रदर्शनमा आउने तालिका तय छ।
-1746009348.jpg)
