नेपाली फिल्म 'मुक्तिपुर' को मंगलबार शुभमुहूर्त गरिएको छ।
काठमाडौंको बसुन्धारास्थित इन्द्रायणी मन्दिरमा क्ल्याप तथा स्कृप्ट पूजा गर्दै फिल्मको छायांकन समेत सुरू गरिएको हो।
सुनिल पाण्डेको निर्देशनमा बन्ने फिल्म 'मुक्तिपुर' साहिबा फिल्मस् प्रोडक्सनको ब्यानरमा एभरेष्ट फिल्म एकेडेमीसँगको सहकार्यमा बन्नेछ। विभिन्न छोटा फिल्म तथा र वृत्तचित्र निर्देशनमा अनुभव बटुलेका युवा निर्देशक पाण्डेका लागि ‘मुक्तिपुर’ ठूलोपर्दाको डेब्यू निर्देशन हुनेछ। फिल्मको कथा पनि निर्देशक पाण्डेकै हो।
पछिल्लो १० वर्षदेखि फिल्म अभिनय, निर्देशन, सम्पादन, छायांकन र ध्वनी सम्बन्धि शिक्षा प्रदान गर्दै आएको एभरेष्ट फिल्म एकेडेमीले पहिलोपटक फिल्म निर्माणमा हात हालेको हो।
फिल्ममा नाजिर हुसेन, गौरव पहारी, प्रकाश शाह र एवनराज उप्रेती प्रमुख भूमिकामा रहनेछन्। आकृति बुढाथोकीले यो फिल्मबाट अभिनेत्रीको भूमिकामा रजतपटमा डेब्यू गर्दैछिन्। क्राइम रिभेन्ज जनरामा तयार हुने फिल्मले बदलाको कथा बोल्नेछ।
'एक परिवारको प्रतिनिधित्व गरेको पात्रको जीवनमा घट्ने महत्वपूर्ण घटना र त्यसले उत्पन्न गर्ने परिस्थिति पश्चात उसले गर्ने संघर्ष र सफलताको कथा फिल्मले बोल्नेछ,' निर्देशक पाण्डेले भने।
अभिनेता नाजिर हुसेनले ‘मुक्तिपुर’ आफ्नो करिअरका लागि महत्वपूर्ण हुने विश्वास व्यक्त गरे। 'हरेक फिल्म मेरो लागि नयाँ अनुभव हो। यो फिल्मले मेरो अघिल्ला कामभन्दा फरक कथा र अभिनय दर्शकमाझ ल्याउनेछ,' उनले भने।
म्युजिक भिडिओमा अभिनय गर्दै आएकी आकृति बुढाथोकीले ठूलोपर्दामा अभिनय गर्न पाउँदा उत्साहित भएको बताइन्। अनुभवी निर्माण टिम र कलाकारहरूसँग काम गर्ने अवसर मिल्नु आफ्नो लागि ठूलो उपलब्धि भएको भन्दै उनले आफ्नो भूमिकालाई न्याय गर्ने विश्वास व्यक्त गरिन्।
फिल्ममा घनश्याम जोशी, सरस्वती अधिकारी, अनिल कुर्मी, स्वायम केसी, हरोन अली, उदय अली, सारा शर्मा, अनामिका लामिछाने, विकाश खनाल, रुपेश लामा, आयन परियार, श्रवन रम्तेल, भोला शाह, सफल, गोपाल महतरा, विमल यादव, ओजस्वी विक्रम विष्ट, सुदिप तिमिल्सिना र प्रविणकुमार चौधरीलगायत कलाकारहरूको पनि अभिनय रहनेछ।
विजय राजवंशी र रोशन पासवान निर्माता रहेको फिल्ममा विशाल श्रेष्ठ कार्यकारी निर्माता छन् भने केशव गौतम सह–निर्माता छन्। सञ्जय गुरूङ र सुरज चौधरी लाइन प्रोड्यूसर रहेको फिल्ममा सम्राट बस्नेत द्वन्द्व निर्देशक छन्। छायांकन शरद महतोको रहनेछ भने कला निर्देशक अकी थाक्पा र प्रोडक्सन हेड रूपक प्रताप अधिकारी छन्।
४० दिनको छायांकन तालिकासहित फ्लोरमा निस्किएको फिल्मको प्रदर्शन मिति भने अहिले तय गरिएको छैन। कार्यकारी निर्माता श्रेष्ठका अनुसार छायांकन सम्पन्न भएको करिब ६ महिनभित्र फिल्म प्रदर्शनमा ल्याउने लक्ष्य राखिएको छ।
-1746009348.jpg)
