अभिनेता तथा निर्देशक निखिल उप्रेतीले नेपाली फिल्ममार्फत दर्शकलाई अन्तर्राष्ट्रिय स्तरको स्वाद र प्रस्तुति दिने प्रयासमा आफूहरू रहेको बताएका छन्। यही उद्देश्यसहित फिल्म 'आचार्य' निर्माण गरिएको उनले बताए।
निखिलले विदेशी फिल्मलाई नेपालमा रोक्न नसकिने भन्दै खुला बजारमा नेपाली फिल्मले विदेशी फिल्मसँग प्रतिस्पर्धा गर्न सक्ने क्षमता विकास गर्नुपर्ने बताए।
'हाम्रो देशमा खुला बजार छ। विश्वभरिका फिल्महरू हामीकहाँ आउँछन्। धेरै महँगा फिल्महरू आउँछन् र ती हेर्ने स्वतन्त्रता पनि दर्शकलाई छ,' निखिलले भने, 'तर हामी गरिब छौं भनेर मेहनतमा गरिब नहोऔं।'
उनका अनुसार 'आचार्य'को कथा नेपाली भए पनि प्रस्तुति आधुनिक र सिनेमाटिक बनाइएको छ। फिल्ममा एनामर्फिक लेन्ससँगै क्यामेरा वर्क, स्टन्ट, बीजीएम, साउन्ड, एसएफएक्स र ग्राफिक्समा विशेष ध्यान दिइएको उनले बताए।
'कथा हाम्रो हो, कथावस्तु यहीँबाट सुरू हुन्छ। तर यसको प्रस्तुति फरक हो,' निखिलले भने।
नेपालमा एक्सन दृश्य छायांकनका क्रममा सुरक्षा र अनुमति लिनुपर्ने चुनौती रहेको उनले बताए। कतिपय दृश्य नेपालमा खिच्न नपाएपछि भारतमा गएर छायांकन गर्नुपरेको उनको भनाइ छ।
ट्रेलर सार्वजनिक भएपछि भारतीय तथा दक्षिण भारतीय डिस्ट्रिब्युटरले चासो देखाएको दाबी गर्दै उनले फिल्मले नेपाली बजारसँगै नयाँ बजारका ढोका खोल्ने विश्वास व्यक्त गरे।
'आचार्य' असोज ९ गते (शुक्रबार)देखि प्रदर्शनमा आउँदैछ। फिल्ममा निखिल उप्रेतीसँगै पूर्णिका सिजापति, दीप राज राणा, प्रमोद अग्रहरी, रघु बाबु, रघु करूमान्ची, रोहित चौधरी, ध्रुव कोइरालालगायत कलाकारहरूको अभिनय छ।
-1790072299.jpg)
-1746009348.jpg)
