फिल्म '३६ को आँकडा'को प्रेमगीत ‘बहुलाउँछु कि क्या हो’ सार्वजनिक गरिएको छ। निर्माण पक्षले आइतबार घटस्थापनाको अवसर पारेर गीत सार्वजनिक गरेको हो।
सत्यराज आचार्य र अञ्जु पन्तको स्वर रहेको गीतमा सुरेश अधिकारीको शब्द तथा संगीत छ। गीतको संगीत संयोजन फणिन्द्र राईले गरेका हुन्।
प्रेममा परेपछि मनमा उब्जिने बेचैनी, आकर्षण र प्रिय व्यक्तिको सम्झनाले निम्त्याउने छटपटीलाई गीतमा व्यक्त गरिएको छ। प्रेममा डुबेका पात्रहरूको मनोभाव गीतले समेटछ।
भिडिओमा दुई जोडीको प्रेमलाई प्रस्तुत गरिएको छ। एकातिर रेखा थापा र महेश त्रिपाठीको प्रेमिल सम्बन्ध देखाइएको छ भने अर्कातिर पूजा शर्मा र पुष्प खड्काको प्रेमकथा अघि बढ्छ।
गीतका शब्दसँगै दुवै जोडीका प्रेमिल दृश्य पालैपालो आउँछन्। रेखा र महेश एकअर्काप्रतिको आकर्षणमा रमाइरहँदा पूजा र पुष्प पनि प्रेमको आफ्नै संसारमा हराएका देखिन्छन्। दुवै जोडीको हाउभाउ र भावभंगिमामार्फत प्रेममा हुने उमंग र छटपटीलाई पर्दामा उतार्ने प्रयास गरिएको छ। भिडिओको कोरियोग्राफर राजु शाह हुन्।
'३६ को आँकडा' सबिर श्रेष्ठको निर्देशनमा बनेको हो। फिल्ममा रेखा थापा, निरूता सिंह, पूजा शर्मा, महेश त्रिपाठी, पुष्प खड्का, सुवर्ण थापा र रमेशचन्द सिडारीलगायतको अभिनय छ। अभिनेत्री निशा अधिकारी विशेष भूमिकामा देखिनेछिन्।
रेखा फिल्म्स र काइट्स इन्टरटेनमेन्टको ब्यानरमा निर्माण भएको फिल्मको निर्माता सरस्वती थापा, दुर्गा सापकोटा र गीता श्रेष्ठ हुन्।
निर्देशक श्रेष्ठको कथा र शिवम् अधिकारीको पटकथा रहेको फिल्ममा ईश्वर सिन्केमनको छायांकन, रोशन श्रेष्ठको द्वन्द्व निर्देशन, बनिश शाह र रामप्रसाद चौधरीको सम्पादन छ।
'३६ को आँकडा' आगामी मंसिर १७ गतेदेखि प्रदर्शनमा आउनेछ।
