रामबाबु गुरूङ निर्देशित फिल्म 'कबड्डी ५: आफ्टर द फाइनल म्याच'को ग्रस कमाइ १३ करोड रूपैयाँ नजिक पुगेको छ।
फिल्मले पछिल्लो आइतबारसम्म बक्स अफिसमा १२ करोड ९४ लाख रूपैयाँभन्दा बढी ग्रस कमाइ गरेको हो। तर प्रदर्शनको सुरूआती दिनमा आक्रामक व्यापार गरेको फिल्मको कमाइको रफ्तार पछिल्लो समय भने निकै सुस्ताएको छ।
चलचित्र विकास बोर्डले सोमबार सार्वजनिक गरेको बक्स अफिस विवरणअनुसार फिल्मले आइतबारसम्म १२ करोड ९४ लाख १५ हजार ४३७ रूपैयाँ ग्रस कमाइ गरेको छ। यस अवधिमा फिल्मका ४ लाख २२ हजार ८९० वटा टिकट बिक्री भएका छन्।
कात्तिक ६ गतेदेखि प्रदर्शनमा आएको फिल्मले सुरूआती १० दिनमै १० करोड रूपैयाँभन्दा बढी कमाइ गरेको थियो। त्यसपछिको सात दिनमा फिल्मले १ करोड ६३ लाख १८ हजार ५३० रूपैयाँ थपेको थियो। तर, पछिल्लो एक सातामा भने यसको व्यापार झनै सुस्ताएको छ।
अघिल्लो साताको तुलनामा अहिले फिल्मको थप कमाइ घटेर ५४ लाख २३ हजार १९२ रूपैयाँमा सीमित भएको छ। यसरी हेर्दा फिल्मले पहिलो १० दिनमा दैनिक औसत १ करोड रूपैयाँभन्दा बढी ग्रस कमाइ गरेको थियो। त्यसपछिको सात दिनमा दैनिक औसत कमाइ करिब २३ लाखमा झरेको थियो भने पछिल्लो सातामा यो घटेर करिब ७ लाख ७५ हजार रूपैयाँमा सीमित भएको छ।
फिल्मको व्यापारको रफ्तार घट्नुमा औसत वर्ड अफ माउथ र बलिउड फिल्म 'रामायण'को प्रदर्शनलाई मुख्य कारण मानिएको छ। यद्यपि, समग्र कमाइका आधारमा 'कबड्डी ५' यस वर्ष सर्वाधिक व्यापार गर्ने नेपाली फिल्मको सूचीमा दोस्रो स्थानमा छ।
फिल्ममा दयाहाङ राई, विपिन कार्की, विजय बराल, बुद्धि तामाङ, रिश्मा गुरुङ, सिर्जना गुरूङ, मिरूना मगरलगायत कलाकारको अभिनय छ।