बलिउड अभिनेता रणवीर कपूर अभिनीत फिल्म 'एनिमल' शुक्रबारदेखि प्रदर्शन हुँदैछ। यस फिल्मलाई सन्दिप रेड्डी वांगाले निर्देशन गरेका हुन्।
फिल्मको ट्रेलर सार्वजनिक भएपछि दर्शक फिल्मप्रति उत्साहित रहेका छन्। फिल्ममा अभिनेता बबि देओलले भिलेनको भूमिकामा देखिएका छन्। ट्रेलरमार्फत बबी पनि दर्शकको ध्यान खिच्न सफल भएका छन्। उनको हिंस्रक अवतारलाई दर्शकले रूचाएका छन्।
फिल्मको ट्रेलर सार्वजनिक कार्यक्रममा उनले भिलेनको भूमिका निर्वाह गर्नुको कारण खुलाएका छन्।
'यस फिल्मको लागि सन्दीपले फोन गर्दा मेरो राम्रो स्थिति थिएन। मेरो करियर यस्तो अवस्थामा पुगेको थियो कि मैले यति ठूलो भूमिका पाउँछु भनेर सोचेको समेत थिइनँ,' उनले भने।
यो फिल्ममा उनी पहिलो पटक भिलेनको भूमिकामा देखिन लागेका हुन्। फिल्ममा रणवीर कपूर, रश्मिका मन्दना र अनिल कपूरको पनि मुख्य भूमिका छ। फिल्ममा अनिल रणवीरको बाबुको भूमिकामा छन् भने रश्मिका उनको श्रीमतीको भूमिकामा देखिएकी छन्।
भुषण कुमार, प्रणय रेड्डी, मुरद खेतानी र कृष्ण कुमारले लगानी गरेको फिल्मको कथा निर्देशक सन्दिपले नै लेखेका हुन्।
यो फिल्म हिन्दी, तमिल, तेलुगु, मलयालम र कन्नड गरी पाँच भाषामा प्रदर्शन हुँदैछ।
