फिल्म 'रामायण' अभिनेता रणवीर कपूरको करिअरकै सर्वाधिक कमाइ गर्ने सिनेमा बनेको छ। प्रदर्शनको सात दिनमै फिल्मले विश्वव्यापी बक्स अफिसमा ९३५ करोड भारू कमाउँदै रणवीरको अघिल्लो ब्लकबस्टर 'एनिमल'को रेकर्ड तोडेको हो।
हिन्दुस्तान टाइम्सका अनुसार ‘एनिमल’ले आफ्नो प्रदर्शन अवधिभर विश्वव्यापी रूपमा ९१५ करोड भारू कमाएको थियो। तर 'रामायण'ले एक सातामै उक्त आँकडा पार गरेको हो। यससँगै फिल्मले आमिर खानको 'सेक्रेट सुपरस्टार' (९१६ करोड) र सलमान खानको 'बजरंगी भाइजान' (९२१ करोड) को लाइफटाइम कलेक्सनलाई समेत उछिनेको छ।
बुधबार मात्रै फिल्मले भारतमा ७० करोड भारू नेट कमाइ गरेको थियो। सात दिनमा 'रामायण'को भारतमा नेट कलेक्सन ५११ करोड र ग्रस कलेक्सन ६११ करोड भारू पुगेको छ। विदेशी बजारबाट ३४.५ मिलियन अमेरिकी डलर कमाएको फिल्मको विश्वव्यापी ग्रस कलेक्सन ९३५ करोड भारू पुगेको हो।
नितेश तिवारी निर्देशित 'रामायण'मा रणवीर कपूर राम, साई पल्लवी सीता, यश रावण र रवि दुबे लक्ष्मणको भूमिकामा छन्।
यो फिल्मले नेपालमा समेत राम्रो कमाइ गरिरहेको छ। नेपालमा पनि फिल्म एकसाथ रिलिज भएको थियो।
