दक्षिण भारतीय स्टार प्रभास अभिनीत फिल्म 'द राजा साब' विश्वव्यापी बक्स अफिसमा दिन प्रतिदिन कमजोर बन्दै गएको छ। ठूलो अपेक्षा राखिएको फिल्मको सुरूआती प्रदर्शन निराशाजनक देखिएको हो।
फिल्मले रिलिजको पहिलो दिन विश्वभरबाट करिब १ सय करोड भारू ग्रस कमाएको थियो। तर त्यसपछि विश्वव्यापी कमाइमा शनिबार र आइतबार ठूलो गिरावट देखिएको थियो।
चौथो दिनसम्ममा फिल्मले विश्वव्यापी बक्स अफिसमा १ सय ७० करोड भारू ग्रस कमाइ गरेको भारतीय संचारमाध्यमहरूले जनाएका छन्।
यो कमाइ प्रभासका अघिल्ला ठूला फिल्महरू 'साहो' र 'आदिपुरूष' भन्दा पनि कमजोर मानिएको छ।
ट्रेड वेबसाइट स्याक्निल्कका अनुसार फिल्मले सोमबार भारतमा जम्मा ६ करोड ६० लाख भारू मात्रै नेट कमाइ गर्न सफल भयो। यो कमाइ आइतबारको तुलनामा झन्डै ६५ प्रतिशत गिरावट हो। फिल्मले आइतबार १९ करोड १० लाख भारू नेट कमाएको थियो।
फिल्मले शुक्रबार ५३ करोड ७५ लाख र शनिबार २६ करोड भारू नेट कमाएको थियो। चार दिनमा भारतमा फिल्मले १ सय १५ करोड १८ लाख नेट (लभभग १३७ करोड ग्रस) कमाएको जनाइएको छ।
मारूति निर्देशित 'द राजा साब' करिब ३ सय ५० करोड भारूमा बनेको बताइएको छ। फिल्ममा प्रभासहित सञ्जय दत्त, बोमन इरानी, मालविका मोहनन, निधि अग्रवाल, रिद्धि कुमार, जरिना वहाबलगायत कलाकारहरूको अभिनय छ।
नेपालमा समेत 'द राजा साब' प्रदर्शन भइरहेको छ।
-1746009348.jpg)
