दक्षिण भारतीय अभिनेता प्रभास अभिनीत फिल्म 'द राजा साब' ले बक्स अफिसमा राम्रो व्यापार गर्ने अपेक्षा थियो। रिलिजअघि यो हरर कमेडी फिल्मको राम्रो चर्चा थियो। तर यो फिल्मको व्यापार अपेक्षित नरहेको भारतीय संचारमाध्यमहरूले जनाएका छन्।
रिलिजको पाँचौं दिनसम्म आइपुग्दा फिल्मको व्यापारमा लगातार गिरावट देखिएको छ।
ट्रेड वेबसाइट स्याक्निल्कका अनुसार फिल्मले मंगलबार भारतमा जम्मा ४ करोड ८० लाख भारू नेट कमाइ गरेको छ। यसअघि सोमबार ६ करोड ६० लाख कमाएको थियो।
आइतबार भारतमा फिल्मको कमाइ १९ करोड १० लाख थियो भने शनिबार २६ करोड भारू नेट कमाएको थियो। रिलिजको पहिलो दिन फिल्मले भारतमा ५३ करोड ७५ लाख भारू नेट कमाइ गरेको थियो।
पहिलो दिन राम्रो ओपनिङ पाए पनि दर्शकको चासो कायम रहन नसक्दा फिल्मको व्यापारमा गिरावट आउँदै गएको भारतीय संचारमाध्यमले जनाएका छन्। विशेषगरी हिन्दी बेल्ट तथा केही दक्षिण भारतीय बजारमा फिल्मको शो संख्या घट्दै गएको र दर्शक उपस्थिति कमजोर देखिएको रिपोर्टमा उल्लेख छ।
पाचौं दिनसम्ममा फिल्मको विश्वव्यापी बक्स अफिसमा ग्रस कमाइ १ सय ७५ करोड ३५ लाख भारू पुगेको जनाइएको छ। त्यस्तै भारतमा फिल्मको कमाइ १ सय १९ करोडभन्दा माथि पुगेको जनाइएको छ।
मारूति निर्देशित 'द राजा साब' करिब ३ सय करोड भारूभन्दा बढी लगानीमा बनेको जनाइएको छ। फिल्ममा प्रभासहित सञ्जय दत्त, बोमन इरानी, मालविका मोहनन, निधि अग्रवाल, रिद्धि कुमार, जरिना वहाबलगायत कलाकारहरूको अभिनय छ।
'द राजा साब' नेपालमा समेत प्रदर्शन भइरहेको छ। नेपालको कमाइ आउँदो सोमबार सार्वजनिक हुनेछ।
-1746009348.jpg)
