बलिउड फिल्म 'बोर्डर २' ले बक्स अफिसमा राम्रो सुरूआत गरेको छ।
प्रदर्शनको दुई दिनमा फिल्मको विश्वव्यापी कमाइ १ सय करोड नजिक पुगेको भारतीय संचारमाध्यमले जनाएका छन्।
ट्रेड वेबसाइट स्याक्निल्कका अनुसार फिल्मले शुक्रबार र शनिबार दुई दिनमा विश्वव्यापी बक्स अफिसमा ९३ करोड ६० लाख भारू ग्रस कमाइ गरेको छ।
भारतमा ७८ करोड ६० लाख र बाहिरी देशमा १५ करोड भारू कमाएको हो। पहिलो दिन फिल्मले विश्वव्यापी बक्स अफिसमा ४३ करोड ५० लाख भारू ग्रस कमाएको थियो।
फिल्मको 'वर्ड अफ माउथ' सकारात्मक रहेकाले आइतबारको व्यापार पनि राम्रो रहने अपेक्षा गरिएको छ।
अनुराग सिंह निर्देशित 'बोर्डर २' भारत-पाकिस्तान युद्धको पृष्ठभूमिमा आधारित छ। फिल्ममा सनी देओल, वरूण धवन, दिलजीत दोसांझ, अहान शेट्टी लगायत प्रमुख भूमिकामा छ।
'बोर्डर २' नेपालका सिनेमा हलहरूमा समेत शुक्रबारदेखि नै प्रदर्शनरत छ।
-1746009348.jpg)
