भारतीय बहुप्रतीक्षित फिल्म 'रामायण'ले प्रदर्शनको १० दिनअघि नै अग्रिम टिकट बिक्रीबाट विश्वभर २० करोड भारूभन्दा बढी आम्दानी गरेको छ।
भारतीय सञ्चारमाध्यम हिन्दुस्तान टाइम्सका अनुसार नोभेम्बर ५ देखि प्रदर्शनमा आउन लागेको फिल्मले अक्टोबर २५ सम्म विश्वव्यापी अग्रिम टिकट बिक्रीबाट २० करोड भारूको आँकडा पार गरेको हो।
नितेश तिवारी निर्देशित फिल्मको अग्रिम टिकट बिक्रीले सुरूआती चरणमै दर्शकको उत्साहजनक प्रतिक्रिया पाएको छ। फिल्ममा रणवीर कपुर, यश र साई पल्लवी मुख्य भूमिकामा छन्।
समाचारअनुसार भारतमा मात्रै फिल्मको अग्रिम टिकट बिक्रीबाट १० करोड भारूभन्दा बढी कमाइ भएको छ। भारतमा पहिलो दिनको प्रदर्शनका लागि दुई लाखभन्दा बढी टिकट बिक्री भइसकेको जनाइएको छ।
फिल्मको हिन्दी संस्करणको टिकट बिक्री सबभन्दा बढी छ। भारतमा भएको कुल अग्रिम टिकट बिक्रीमध्ये करिब ८७ प्रतिशत हिस्सा हिन्दी संस्करणले ओगटेको छ।
त्यस्तै, कन्नड संस्करणले एक करोड भारूभन्दा बढीको अग्रिम टिकट बिक्री गरेको छ। तेलुगु संस्करणको अग्रिम बुकिङ पनि ४० लाख भारू हाराहारीमा पुगेको समाचारमा उल्लेख छ।
भारतबाहेक उत्तर अमेरिकामा पनि फिल्मको अग्रिम टिकट बिक्री उत्साहजनक देखिएको छ।
फिल्मको व्यापारसम्बन्धी तथ्यांक सार्वजनिक गर्ने वेबसाइट स्याकनिल्कका अनुसार उत्तर अमेरिकामा नोभेम्बर ४ मा हुने विशेष प्रदर्शनका लागि पाँच लाख ५० हजार अमेरिकी डलर बराबरको टिकट बिक्री भएको छ।
त्यस्तै, विदेशमा फिल्मको नियमित प्रदर्शनको पहिलो दिनका लागि थप चार लाख अमेरिकी डलर बराबरको अग्रिम टिकट बिक्री भएको छ।
यी सबै बजारको अग्रिम टिकट बिक्री जोड्दा अक्टोबर २५ सम्म फिल्मले विश्वव्यापी रूपमा २० करोड भारू बढीको आम्दानी गरेको हिन्दुस्तान टाइम्सले जनाएको छ।
भारतीय पौराणिक महाकाव्य रामायणमा आधारित यस फिल्ममा रणवीर कपुर भगवान् रामको भूमिकामा देखिँदै छन्। अभिनेत्री साई पल्लवीले सीता र अभिनेता यशले रावणको भूमिका निर्वाह गरेका छन्। त्यस्तै, रवि दुबे लक्ष्मण र सनी देओल हनुमानको भूमिकामा छन्।
ठूलो बजेटमा निर्माण भएको फिल्म दुई भागमा तयार पारिएको छ। यसको पहिलो भाग नोभेम्बर ५ (कात्तिक १९), २०२६ मा विश्वव्यापी प्रदर्शनमा आउने तयारी छ। दोस्रो भाग सन् २०२७ को दीपावलीमा प्रदर्शन हुनेछ।
