भारतीय अभिनेत्री सारा अली खानले आफ्नो फिल्मी करियरमा बुबा सैफ अली खानले कहिल्यै सिफारिस नगरेको बताएकी छन्।
भारतीय संचारमाध्यम फिल्मफेयरसँगको कुराकानीमा उनले बलिउडमा आफ्नो कोही गडफादर नभएको र करियरका चुनौती आफैंले सामना गर्नुपरेको बताएकी हुन्।
साराले नेपोटिज्मबारे कुरा गर्दै फिल्मी परिवारमा जन्मिएका कलाकारले अवसर पाए पनि उनीहरूको मेहनतलाई बेवास्ता गर्न नहुने बताएकी छन्।
कुराकानीमा उनले भनेकी छन्, 'मेरा बुबाले मलाई फिल्ममा काम दिलाउन निर्माताहरूसँग कहिल्यै सिफारिस गर्नुभएन। मेरो फिल्मी करियर अघि बढाउन उहाँले निर्माताहरूसँग पहल पनि गर्नुभएन।'
आफ्नो पहिलो फिल्म 'केदारनाथ' निर्माणका क्रममा समस्या आउँदा पनि आफैंले त्यसको सामना गर्नुपरेको साराले बताइन्। फिल्मी परिवारमा जन्मिएकाले अवसर र पहिचान पाएको स्वीकार गर्दै उनले त्यसपछि आफ्नो करियरमा गरेको मेहनतको पनि मूल्यांकन हुनुपर्ने धारणा राखेकी हुन्।
सारा अभिनेता सैफ अली खान र अभिनेत्री अमृता सिंहकी छोरी हुन्। उनी आमा अमृतासँग बस्दै आएकी छिन्। सैफ अली र अमृता सन् २००४ मा अलग भएका थिए।
साराले सन् २०१८ मा ‘केदारनाथ’ बाट बलिउडमा डेब्य गरेकी थिइन्। त्यसपछि उनले 'सिम्बा', 'अतरंगी रे', 'जरा हटके जरा बचके', 'ए वतन मेरे वतन' जस्ता फिल्महरूमा अभिनय गरेकी छन्।
साराको पछिल्लो फिल्म 'उडता तीर' हो। नेपालमा भने यो फिल्म रिलिज भएको छैन।
